О́ńirlik mekemeniń saqtaý ǵımaraty nebári 500 myń dana qujatqa arnalǵan. Osyǵan oraı tarıhı qujattardy saqtaý orny jetispeı otyr.
– Jalpy, oblystaǵy arhıvterdiń barlyǵynda oryndar tolýǵa jaqyn nemese tolyp tur. Saqtaý oryndaryn kóbeıtý týraly jaýapty mınıstrlikke usynystarymyzdy jiberip, jańadan qosymsha ǵımarattar salýǵa oń sheshim alǵanbyz. Biraq byltyr bıýdjettik shyǵyndar ońtaılanýǵa baılanysty bul jobalar toqtap qaldy. Bıyl aýdan-qalalarda jobalar qolǵa alynady degen senimdemiz. Birdi-ekili aýdanda ǵana kommýnaldyq jelilerge, jerge baılanysty máseleler sheshilmegen. Eger qurylysqa arnalǵan qarajat sheshiletin bolsa, ol máselelerdiń kúrmeýin tarqatýǵa bolady. Jańa ǵımarattar kezeń-kezeńimen turǵyzylýy kerek. Qazirgi jumys istep turǵan arhıv mekemeleriniń tek ekeýi ǵana tıptik ǵımarat bolyp esepteledi (ekeýi de oblys ortalyǵynda). Qalǵany beıimdelgen ǵımarattar, – deıdi oblystyq mádenıet, tilderdi damytý jáne arhıv isi basqarmasy basshysynyń orynbasary Saıaýysh Sádýaqasov.
Oblystyq arhıvte saqtalǵan qujattardyń eń kónesi HIH ǵasyrdyń basyna tıesili. Al qordyń denin ótken ǵasyrdyń basynan bergi qujattar quraıdy. Arhıv salasynda maman tapshylyǵy baıqalyp otyrǵan joq. «Arhıv-2025» baǵdarlamasy aıasynda qujattardy sıfrlandyrý jalǵasyp jatyr. Búginge deıin 150 myńnan astam qujat sıfrlansa, olardyń basym bóligi memlekettik is qujattarynan turady. Aldaǵy ýaqytta jeke tektik qujattar da sıfrlyq júıege kóshedi degen jospar bar. Bıyl oblystyq arhıvtiń qosymsha 40 myńdaı qujatty elektrondy túrde tanystyramyz degen jospary bar.
– Qujattardy sıfrlandyrý – qordaǵy qaǵaz júzindegi qujattar joıylyp ketedi degen sóz emes. Arhıv qujattary kemi – 45, ortasha 75 jyldaı saqtalýy kerek. Al keıbir mańyzdy qujattar máńgilik saqtalyp tura beredi. Sıfrlansa da jarııalaýǵa jatpaıtyn qupııa qujattar da bar. Sondyqtan barlyǵyn sıfrlyq júıege kóshirip, taýdaı bolyp úıilip turǵan qaǵaz qujattaryn joıý oıǵa syımaıtyn dúnıe. Arhıvterge saqtaý oryndary aýadaı qajet. Al skanerlengen qujattardy jeke azamattar qalaǵan ýaqytynda kez kelgen jerden ashyp kóre alady. E-arhıv júıesi de jumys istep tur, – dep qosty basqarma ókili.
Oblysta sıfrlyq modýlmen jumys isteıtin mamandar máselesi, qyzmetkerlerdiń biliktiligin kóterý únemi nazarda. Qujattardy toptastyryp, ár jyl saıyn jınaq kitapshalar shyǵarý dástúrge aınalǵan. Saıası qýǵyn-súrgin men asharshylyq jyldaryna qatysty qujattar sońǵy birneshe jylda jıi jaryq kóre bastaǵan.
Bıyl óńirdegi arhıv qyzmetiniń qurylǵanyna 100 jyl tolyp otyr. Soǵan oraı oblystyq arhıvke qaraıtyn ǵımarattyń birine jóndeý júrgizilmekshi. Qazir qazynadan qarajat bólinip, merdigerdi anyqtaý boıynsha konkýrstyq is-sharalar júrip jatyr.
Pavlodar oblysy
