- Batýtta sekirýden Bakýde shymyldyǵy túrilgen Álem kýboginde elimizdiń quramasy kúmis medaldy enshiledi. Sınhrondy sekirý saıysynda Danıl Musabaev pen Nıkıta Týmakov tek japonııalyq juptan qalyp qoıdy.
- Bul kúnderi Kanadanyń Kvebeginde short-trekten jastar arasyndaǵy (U-18) Álem kýbogi ótip jatyr. Quramynda Alına Qajyǵalıeva, Zeınep Qumarhan, Dinmuhamed Tájibaı, Bogdan Vehov syndy saıypqyrandary bar elimizdiń quramasy aralas estafetada kúmis medalǵa qol jetkizdi. Jerlesterimiz tek Ońtústik Koreıanyń oǵylandaryna ese jiberdi. Qola júldeni Kanada quramasy enshiledi.
- Sadaq atýdan Taılandta shymyldyǵy túrilgen Azııa kýboginde Roksana Iýnýsova kúmis medaldy moınynda jarqyratty. Báseke barysynda ol komandalyq eseptegi álem chempıonatynyń qola júldegeri Iohıýna Ohany jolynan yǵystyrdy, sheshýshi tusta ońtústikkoreıalyq Sıýndjeon Hanǵa ese jiberdi. Aralas juptar saıysynda Andreı Tıýtıýn men Vıktorııa Lıan da dál sol mejeden kórindi.
- Elimizdiń konkıshileri Álem kýboginde altyn tuǵyrǵa kóterile almaı júrgenine baqandaı 14 jyl bolǵan eken. Sol olqylyqtyń ornyn Evgenıı Koshkın toltyrdy. Polshanyń Tomashýv-Mazoveskıinde jalaýy jelbiregen jarysta jerlesimiz 500 metrlik qashyqtyqty 34,52 sekýndta júgirip ótip, jeńimpaz atandy. Ekinshi, úshinshi oryndardy kanadalyq Loren Dıýrel (34,70) men polshalyq Marek Kanııa (34,76) ıelendi.
- Polshanyń astanasy – Varshavada uıymdastyrylǵan Eýropa kýbogi jolyndaǵy jarysty elimizdiń quramasy eki júldemen qorytyndylady. 60 kg salmaq dárejesiniń fınalynda qos dzıýdoshymyz – Sherzod Davlatov pen Aman Baqytjan ózara kúsh synasty. Bul beldesý Sherzodtyń paıdasyna sheshildi.
- Medeý muz aıdynynda konkıden elimizdiń kýbogi aıaqtaldy. Eki kúnge sozylǵan jarys qorytyndysynda túrli qashyqtyq boıynsha erler arasynda Dmıtrıı Bıchýrkın (Qostanaı), Qudaıbergen Temirjanov (Almaty), Azamat Satqoja (Astana), Aldııar Tólegenov (Astana) top jarsa, áıelder saıysynda Alena Lıfatova (Pavlodar), Aızada Rymbek (Astana), Alına Daýranova (Astana), Eńlik Járdembekqyzy (Astana) jeńimpaz atandy.
- Fýtboldan elimizdiń sýperkýboginiń fınalynda «Qaırat» pen «Aqtóbe» kezdesti. «Astana Arenada» ótken match 2:0 esebimen almatylyqtardyń paıdasyna sheshildi. Oıynnyń 58-mınýtynda Elder Santana esep ashsa, 87-mınýtta Valerıı Gromyko ekinshi goldy soqty. Osylaısha, «Qaırat» úshinshi márte el sýperkýbogin oljalady.
