Sýretti túsirgen – Valerıı BÝGAEV
«Bıyl jóndelýge tıis 417 shaqyrymnyń 96 shaqyrymy – respýblıkalyq mańyzy bar joldar. Aýyldyq eldi mekenderdegi kóshelerdi jóndeý boıynsha jalpy uzyndyǵy 89,9 km bolatyn 38 joba iske asady. О́ńirde aýyldardyń kirme joldaryn jóndeýge mańyz berilip otyr. Keıingi eki jylda 59 kirme jol jóndelse, taǵy 62 joldy keler jyldyń sońyna deıin aıaqtaý kerek. Bıyl jergilikti avtokólik jol men kóshelerdi jóndeýge 25,3 mlrd teńge bólingen. Byltyr 795 km joldy qaıta jańartyp, jóndeýge 68 mlrd teńge jumsaldy», deıdi Jolaýshylar kóligi jáne avtomobıl joldary basqarmasy basshysynyń mindetin atqarýshy Narıman Omar.
96 shaqyrymdyq avtojoldyń 3 ýchaskesine qarjy bólinbek: Atameken – Ertis – Rýsskaıa Polıana, Qalqaman – Baıanaýyl – Úmitker – Botaqara, Astana – Ereımentaý – Shiderti. Mamannyń sózinshe, aımaq avtojoldarynda tórt kezeńnen turatyn sapany baqylaý júrgiziledi. Ulttyq jol aktıvteri sapasy ortalyǵynyń baqylaýy, avtorlyq jáne tehnıkalyq baqylaý, sondaı-aq qoǵamdyq baqylaý bar. Jyl basynan beri 3 031 shaqyrym avtojol tekserilip, 200-ge jýyq aqaý anyqtalyp, kemshilikterdi joıý boıynsha 137 nusqama berilgen.
«Avtojoldardy tıisti deńgeıde ustamaǵany, sondaı-aq joldarda jumys júrgizý qaǵıdasyn buzǵany úshin 21 laýazymdy jáne zańdy tulǵaǵa 800 myń teńgeden astam aıyppul salyndy. Joldarda jumys júrgizý, jol men jol qurylysyn kútip ustaý erejelerin buzǵany úshin Aqtoǵaı jáne Tereńkól aýdandaryndaǵy turǵyn úı-kommýnaldyq sharýashylyq bóliminiń basshylary ákimshilik jaýapkershilikke tartyldy. Olar vedomstvolyq baǵynysty ýchaskeni kútip ustaý boıynsha talaptardy oryndamaǵan. Sheneýnikterdiń árqaısysyna 39 320 teńge aıyppul salyndy», dep habarlady óńirlik polısııa departamentiniń baspasóz qyzmeti.
Olqylyqtar respýblıkalyq mańyzy bar Pavlodar – Qyzylorda avtojolynda da kezdesip qalady. Áıtkenmen Ertis–Baıan óńirindegi avtojoldardyń shamamen 90%-dan astamy qanaǵattanarlyq deńgeıde dep baǵalanady.
Pavlodar oblysy
