Foto: Senat
Senat Spıkeri Máýlen Áshimbaevtyń kezdesýge qatysýshylarǵa arnalǵan quttyqtaýyn orynbasary Jaqyp Asanov jarııa ete kele, jasandy ıntellekti damytý men onyń etıkalyq máselesiniń mańyzyna toqtaldy. Ol jasandy ıntellekt qazirdiń ózinde ómirdiń ajyramas bóligine aınalǵanyn jáne medısına, bilim berý, memlekettik basqarýmen qosa túrli salalarǵa belsendi túrde engizilip jatqanyn atap ótti.
«Jasandy ıntellekt qazirdiń ózinde bizdiń ómirimizdiń ajyramas bóligine aınaldy. Ol álemniń kelbetin ózgertti jáne medısınadan bilim berýge deıingi negizgi salalarǵa dendeı endi. Senatta da ony zań shyǵarý úderisine engizý boıynsha jumys qolǵa alyndy. JI qoǵamnyń qajetin taldaı alady, zańdardyń saldaryn boljaı alady, normatıvtik aktilerdi daıyndaýǵa kómektesedi. Biz qazirdiń ózinde álemdik tájirıbeni zerdeleýdemiz jáne sarapshylarmen ózara is-qımyldy bastadyq. Parlament ózgeristerge ashyq jáne zamanaýı tehnologııany engizýge daıyn», dedi Senat Vıse-spıkeri Jaqyp Asanov.
Sharaǵa memlekettik organdardyń ókilderi, ǵylymı-zertteý ınstıtýttarynyń jetekshi sarapshylary, IT-sala mamandary, Senat depýtattary Darhan Qydyráli, Ǵalıasqar Sarybaev, Naýryzbaı Baıqadamov, Alısher Satvaldıev qatysty.
Senattyń baspasóz qyzmetiniń málimdeýinshe qatysýshylar vorkshoptyń toptyq sessııalary aıasynda jasandy ıntellekttiń damý kezeńderi men ınnovasııalaryn, tildik úlgiler men sıfrlyq lıngvıstıkany, jasandy ıntellekt ekojúıesin damytý máselelerin talqylady. Densaýlyq saqtaýda JI-di qoldanýǵa, atap aıtqanda, ozyq algorıtmderdi qoldana otyryp, medısınalyq sıntetıkalyq derekterdi generasııalaýǵa erekshe nazar aýdaryldy. Sonymen qatar, keleshekte jasandy ıntellekti etıkalyq retteý jáne onyń qoǵamǵa áseri týraly aıtyldy.
2023 jyly Senat Tóraǵasy Máýlen Áshimbaevtyń qatysýymen Astanada ótken Álemdik jáne dástúrli dinder lıderleri Sezi Hatshylyǵynyń XXI otyrysy aıasynda Musylman aqsaqaldar keńesi Ortalyq Azııa Bıýrosynyń keńsesi ashylǵan bolatyn. О́kildik sodan beri Ortalyq Azııanyń búkil óńirin qamtı otyryp belsendi jumys istep keledi.
