2024-2025 jyldar aralyǵynda Adamdardy zańsyz áketýge, ákelýge, satýǵa qarsy kúres máseleleri jónindegi vedomstvoaralyq komıssııaǵa Eńbek jáne halyqty áleýmettik qorǵaý mınıstrligi tóraǵalyq etedi. Úkimettiń 2024-2026 jyldarǵa arnalǵan Adam saýdasyna baılanysty qylmystardyń aldyn alý jáne olarǵa qarsy kúres jónindegi is-sharalar jospary júıeli iske asyp keledi. Jospar 55 tarmaqtan turady. Onyń úılesimdi júrgizilýine birqatar ortalyq memlekettik, jergilikti atqarýshy organdar, «Atameken» UKP, basqa da uıymdar jaýapty bolyp belgilengen.
Eńbek jáne halyqty áleýmettik qorǵaý mınıstrligi jergilikti atqarýshy organdarmen birlesip adam saýdasynyń qurbandaryna arnaýly áleýmettik qyzmet kórsetý, olardy jumysqa ornalastyrý jónindegi is-sharalardy oryndaıdy. Áleýmettik kodekske sáıkes, adam saýdasynyń qurbandaryna arnaýly áleýmettik qyzmettiń kepildendirilgen kólemi, onyń ishinde áleýmettik turmystyq, medısınalyq, psıhologııalyq, pedagogıkalyq, eńbek, mádenı, ekonomıkalyq, quqyqtyq qyzmetter kórsetiledi. Qyzmet kórsetý merzimi – 6 aı. Eger qylmystyq is aıaqtalmasa nemese azamat medısınalyq uıymda stasıonarlyq emdeýde bolǵan jaǵdaıda merzimdi 9 aıǵa deıin uzartýǵa múmkindik bar.
Elimizde adam saýdasynyń qurbandaryna arnaýly áleýmettik qyzmetter kórsetetin 13 daǵdarys ortalyǵy jumys isteıdi. Onyń ishinde memlekettik sektorda Abaı oblysy, Shymkent qalasynda bir-bir uıymnan bar. Memlekettik áleýmettik tapsyrys sheńberinde Aqmola, Aqtóbe, Jambyl, Jetisý, Qaraǵandy, Qostanaı, Qyzylorda, Soltústik Qazaqstan, Túrkistan (2 uıym) oblystarymen qatar, Astana qalasynda ortalyqtar jumys isteıdi.
Jumyspen qamtý barysynda adam saýdasynyń qurbany bolǵan azamattar «Bastaý Bıznes» jobasy sheńberinde kásipkerlik negizderine onlaın oqýǵa, halyqtyń áleýmettik osal toptaryna beriletin 400 AEK deıingi grant alýǵa, «Jastar praktıkasy», «Alǵashqy jumys orny», «Urpaqtar kelisimsharty» sekildi jobalardan bólek, qysqa merzimdi kásiptik oqýǵa qatysa alady. Bul rette jumyspen qamtýǵa járdemdesýdiń barlyq sharalary ótinish sıpatynda oryndalatynyn atap ótken jón. Múmkindikti paıdalaný úshin el azamattary turǵylyqty jeri boıynsha mansap ortalyǵyna habarlasýy qajet. Bul jaǵdaıda zorlyq-zombylyq nemese adam saýdasynyń qurbany mártebesin kórsetý talap etilmeıdi. Barlyq qyzmet «qupııa» negizinde, mán-jaılardy qosymsha naqtylaýsyz usynylady.
