Soltústik Qazaqstan aýyldaryna aqysyz ǵalamtor qyzmeti jetti

PETROPAVL. 9 aqpan. Budan bylaı Soltústik Qazaqstan oblysy Qyzyljar aýdanyna qarasty «Iаkor» aýylynyń turǵyndary da ǵalamtordyń múmkindikterin keńinen paıdalana alatyn bolady. Bul týraly «Qazposhta» AQ Soltústik Qazaqstan oblystyq fılıalynyń baspasóz qyzmeti habarlady. Jergilikti jerlerdegi poshta bólimshelerinde ınternet baılanysyn jolǵa qoıý arqyly tıisti oryndarǵa kez kelgen ótinish-tilekterdi jetkizýdiń qoljetimdiligin qamtamasyz etý «Qazposhta» AQ jumysyndaǵy basym baǵyttardyń biri sanalady. Osyǵan oraı atalmysh fılıal jyl basynan beri Jambyl aýdanyndaǵy «Blagoveshenka» jáne Maǵjan Jumabaev aýdanyndaǵy «Sovetskoe» aýyldaryndaǵy poshta bólimshelerinde osyndaı qosyndardy ornatqan bolatyn. Endi, mine, «Iаkor» aýylynyń turǵyndary da aqysyz ǵalamtar qyzmetine qosylyp, Aqmola oblysynda issaparda júrgen «Qazpochta» AQ basqarmasynyń tóraǵasy Baǵdat Mýsınmen ınternet baılanysyna shyǵý, ózderin tolǵantqan máseleler boıynsha oı-pikirler almasý múmkindigine ıe boldy. Sóıtip, turǵyndardyń sany úsh myńnan asatyn aýyldyń 50 paıyzy ınternetke qosyldy. Al jasy ulǵaıǵan jandar bolmasa ınternet» tilin» bilmeıtinder poshta bólimshesine kelip, operatorlardyń kómegine júgine alady. Fılıal dırektory Erik Nuraqaevtyń aıtýynsha, mundaı qanatqaqty joba – qalalar men aýyldardyń baılanysyn nyǵaıtýdyń birden-bir tıimdi joly. Memlekettik saıttarǵa tegin kirý, shetelderde nemese basqa qalalarda turatyn týǵan-týystarmen sóılesý, taǵy basqa qyzmet túrleri qarastyrylǵan. Búgingi tańda óńirdiń 88 eldi mekeninde poshta qyzmetiniń 54 paıyzy avtomattandyrylǵan júıege qosylǵan. Aldaǵy mindet – barlyq aýyldy, árbir turǵyndy ınternetke qoljetimdi joldaryn qarastyrý. О́mir Esqalı. Derek: «Qazposhta» AQ Soltústik Qazaqstan oblystyq fılıalynyń baspasóz qyzmeti. Sýret: egemen.kz.