«Bul kitapty jazýda ár qazaq otbasynyń bosaǵasy keń, shańyraǵy bıik bolsyn degen nıetti maqsat tuttym. Kezinde bir jas kelinshek meniń jas otbasyǵa aıtqan aqyl-keńesimdi tyńdap ajyrasý raıynan qaıtqanyn aıtty. Osyndaı shynaıy oqıǵalar da «Otbasy berekesi» kitabyn jazýyma túrtki boldy. Otbasynda er men áıeldiń orny bala úshin mańyzdy. Ulttyq qundylyq nasıhattalatyn, otbasylyq ortadaǵy rýhanı birlikti arttyrýǵa yqpal etetin týyndy oqyrmanǵa unaıdy dep úmittenemin», dedi Orazkúl Asanǵazy. Qoǵam qaıratkeri bul jınaǵynda ómir tájirıbesine súıenip, otbasyndaǵy tárbıeniń mańyzyna, ata-ana men urpaq arasyndaǵy sabaqtastyq pen otbasylyq berekeni saqtaý máselelerine jan-jaqty toqtalady. Taǵylymdy jınaq úsh taraýǵa bólingen, ár taraýda otbasy qundylyqtaryna, urpaq tárbıesiniń ózektiligine basa mán beriledi.
Jıynda belgili ǵalym, dıplomat Ádil Ahmetov «Otbasy berekesi» kitaby bolashaqqa jańadan qadam basqan jas otbasylar úshin taptyrmas dúnıe ekenin aıtty.
«Bul kitapty áýeli jastar oqýy kerek. Jaqsy maqsatqa umtylyp júrgen jastarǵa kóbirek qajet. Avtordyń ózi – jastarǵa úlgi. Jastarǵa arnalǵan kitap bolǵandyqtan, ene men kelinniń orny, balaǵa qandaı ana bolýy kerek degendeı túrli keńes aıtylady. Bir demmen oqylatyn kitap. Kitapty jazý kezinde avtordyń izdenisi baıqalady, otandyq ǵalymdardyń eńbegine úńilgen. Tebirenbeı oqymaý múmkin emes», dedi Á.Ahmetov.
Alqaly jıynǵa kelgen zııaly qaýym ókilderi kitaptyń qoǵamdaǵy mańyzyna úńilip, oılaryn ortaǵa saldy. Is-shara sońynda Erkeǵalı Rahmadıev atyndaǵy Memlekettik akademııalyq fılarmonııanyń Qazaq orkestri ujymynyń dırıjeri Nurlan Bekenovtiń oryndaýynda kúı oınalyp, ónerden shashý shashyldy.
