Ǵylym jáne joǵary bilim mınıstri Saıasat Nurbek óz sózinde Memleket basshysynyń ǵalymdardyń áleýmettik mártebesin kóterý jáne qoldaý kórsetý, sondaı-aq ǵylymǵa jas kadrlardyń kelýin yntalandyrý saıasatynyń arqasynda oń ózgerister oryn alǵanyn atap ótti. Memleket basshysynyń tapsyrmasyn iske asyrý maqsatynda 2024-2026 jyldarǵa arnalǵan qoldanbaly ǵylymdy memlekettik qarjylandyrý kólemi ulǵaıtylǵanyn, jas ǵalymdardy qoldaý sharalary kúsheıtilgenin, ǵylymdy damytý jáne tehnologııalyq saıasatty iske asyrýǵa baǵyttalǵan «Ǵylym jáne tehnologııalyq saıasat týraly» zań qabyldanyp, ǵylymı uıym qyzmetkerleriniń laýazymdyq jalaqylary artqanyn, Ulttyq ǵylym akademııasynyń ınstıtýsıonaldyq róli nyǵaıǵanyn erekshe atap ótti.
UǴA Prezıdenti Aqylbek Kúrishbaev quttyqtaý sózinde Memleket basshysynyń qoldaýynyń arqasynda sońǵy jyldary otandyq ǵylymdy damytýǵa kóp kóńil bólinip, qarjylandyrý kóleminiń 3 esege ulǵaıǵanyn atap ótti. Zańnamalyq baza jańartylyp, túrli ǵylymı-tehnıkalyq is-sharalar men ǵylymı konkýrstar ótkizý arqyly ǵylymdy dáripteý boıynsha jumystary jandana tústi. Alǵash ret memlekettik deńgeıde jas ǵalymdardyń baspana jaǵdaıy qoldaý tapty. Byltyr UǴA tarapynan júrgizilgen áleýmettik saýalnamanyń qorytyndysynda respondentteriniń 60 paıyzy jas ǵalymdardy qoldaýdyń sońǵy 5 jylda edáýir jaqsarǵanyn atap ótken.
Byltyr alǵash ret Prezıdent janyndaǵy UǴA, Ǵylym jáne joǵary bilim mınıstrligi Ǵylym komıtetiniń, Astana Hub jáne sıfrlyq Úkimetti qoldaý ortalyǵynyń qoldaýymen konkýrs sıfrlyq tehnologııalardy paıdalana otyryp, jańartylǵan formatta ótti. Syılyq alýǵa osy júıe arqyly barlyǵy 169 ótinim jáne stıpendııalar boıynsha 1232 ótinim kelip túsken. Barlyq baǵyttar boıynsha básekelestik deńgeıi óte joǵary bolyp, 1 syılyqqa 37 úmitkerden keldi.
Nátıjesinde ǵylymnyń damýyna qosqan úlesi úshin 6 syılyq jáne 75 stıpendııa taǵaıyndaldy. Onyń ishinde ǵylymı máselelerdi sheshý boıynsha zertteýler júrgizýge belsendi qatysqan jáne ǵylymı jurtshylyqqa tanymal 50 daryndy jas ǵalym bar.
Saltanatty shara aıasynda mınıstr Saıasat Nurbek jáne Prezıdent janyndaǵy Ulttyq ǵylym akademııasynyń Prezıdenti Aqylbek Kúrishbaev syılyqtar men stıpendııalar laýreattaryna dıplomdar, tósbelgiler men sertıfıkattar tabys etti.
Gýmanıtarlyq ǵylymdar salasyndaǵy «Eýrazııa ortalyǵynyń ejelgi jáne qazirgi zamanǵy halqynyń genetıkalyq tarıhy: paleogenetıka jáne Y-hromosomanyń fılogeografııasy turǵysynan kózqaras» taqyrybyndaǵy 2024 jylǵy úzdik ǵylymı zertteýi úshin Shoqan Ýálıhanov atyndaǵy syılyqtyń laýreattary bolyp Maqsat Jabaǵın, Jaqsylyq Sábıtov atandy.
Jaratylystaný ǵylymdary salasyndaǵy «Jasyl ekonomıka úshin materıaldar men energııa saqtaý júıeleriniń ınnovasııalyq tehnologııalaryn damytý» taqyrybyndaǵy ujymdyq jumysy úshin Qanysh Sátbaev atyndaǵy syılyqtyń laýreattary bolyp Jumabaı Bakenov, Aıshýaq Qonarov, Araılym Nurpeıisova, Araılym Ahmetbekqyzy, Álııa Muqanova, Nurjan Ýmırov atandy.
Pedagogıka salasyndaǵy «Qazaqstandaǵy naqty ǵylymdar (STEM) salasyndaǵy áıelder tájirıbesin zertteý» taqyrybyndaǵy úzdik ǵylymı zertteý men jumysy úshin Ybyraı Altynsarın atyndaǵy syılyqqa Aınur Almuhambetova, Túrkologııa salasyndaǵy asa zor jetistikteri jáne «Eski qazaq jazba eskertkishteriniń tilindegi arab jáne parsy sózderi» taqyrybyndaǵy úzdik ǵylymı jumysy úshin Kúltegin atyndaǵy syılyqqa Aınur Seıtbekova ıe boldy.
Jaratylystaný ǵylymdary salasyndaǵy «Bolashaqty qurý: Turaqty jáne ıkemdi symsyz jelilerdiń keleshek býynyna arnalǵan qaıta-konfıgýrasııalatyn ıntellektýaldy better» taqyrybyndaǵy úzdik ǵylymı jumysy úshin D.A.Qonaev atyndaǵy jas ǵalymdarǵa arnalǵan syılyqtyń laýreaty bolyp Ǵalymjan Naýryzbaev atandy.
Gýmanıtarlyq ǵylymdar salasyndaǵy «Negizgi qundylyqtardyń lıngvomádenıettanýlyq jáne etnopsıholıngvıstıkalyq zertteýi» taqyrybyndaǵy úzdik ǵylymı jumysy úshin M.O.Áýezov atyndaǵy jas ǵalymdarǵa arnalǵan syılyqqa Gúljana Kúzembaeva ıe boldy.
Jetekshi ǵalymdar men jas ǵalymdar byltyr memlekettik ǵylymı stıpendııalar konkýrsynyń jeńimpazdary atanyp, ǵylym men bilim salasyna qosqan úlesteri úshin joǵary baǵalandy. Marapattalǵan ǵalymdar óz zertteýlerinde jańa baǵyttar ashyp, elimizdiń ǵylymı áleýetin arttyrýǵa zor úles qosyp keledi.
ALMATY
