Dúnıeni dúr silkindirgen pandemııa ómirdiń árbir sátin qadirlep, tirshiliktiń shynaıy mánin uǵynýǵa shaqyrdy. Sýretshiniń sheberligine tańǵalmaýǵa haqyńyz joq... Osy bir alasapyran kezeńde kenepke túsken kemel qoltańba ómir men ólim arasyndaǵy shekara qanshalyqty jińishke bolsa, sol jipteı úmittiń sonshalyqty myqty ekenin uǵyndyrady.
Ajalmen taıtalasqan keıipkerler qarańǵylyqqa jutylyp ketpeý úshin jaryq sáýlege janushyra umtylady. Jaryq pen keńistiktiń úılesimin sheber ushtastyrǵan Mýllashev, qaıǵynyń qara túnegine sińgen dármensizderdiń jan aıqaıyn tús palıtrasy arqyly jetkizedi. Adamdardyń ajal aldyndaǵy jalǵyzdyǵy men sharasyzdyq sezimi kórermenge emosıanaldy áser qaldyrady. Ashyq boıaýdyń salqyn reńi ólimniń sýyq jelin údetse, kózge kóriner-kórinbes tátti boıaýlardan úmittiń álsiz nury syǵalaıdy. Keıipkerler júzindegi emosııalardan janyńyz túrshigip, ózińizdi bir sát sol arpalystyń bel ortasynda júrgendeı sezinesiz. Kompozısııadaǵy tereńdik pen dramatızm orman oıǵa jeteleıdi. Úmit pen úreı shıelenisin sheber beınelegen sýretker árbir boıaý syzyǵyn jan aıqaıymen óredi.
«Sýretshi jaı ǵana qııal adamy emes. Sýret salý – shyǵarmashylyq jumys. Kartınalar ómirsheń bolyp, aýdıtorııasyn tabýy úshin ómir shyndyǵynan shalǵaı bolmaýy kerek. Kózben kórip, qolmen ustaýǵa kelmeıtin nárseniń obrazyn sanama syzyp alamyn. Pandemııa kezinde adamdarda túrli emosııa, kózqaras paıda boldy. Aınalamyz qoldan kelgenshe qaýipti vırýstan qorǵanýǵa, qutylýǵa tyrysty. Dárigerler adam ómiri úshin arpalysty, basqalar da adamzattyń qaýipsizdigi men bolashaǵy úshin túrli shara qoldandy. Pandemııa ótkinshi bolǵanymen, onyń qaldyrǵan sabaǵy máńgilik. Adamzat endi burynǵydaı bola almaıdy. Adamdar saǵynyshty qaıta ashty. Terezeden kirgen kún sáýlesi, kóktemgi gúlderdiń ıisi, balalardyń kúmis kúlkisi – mine, naǵyz ómirdiń máni osy ekenin uǵyndy. Ýaqyt shekteýli ekenin, jaqyndarymen birge ótkizgen árbir sáttiń baǵa jetpes qundylyq ekenin sezindi. Mundaıda naǵyz shyǵarmashylyq adamdary jańa týyndy jasap, halyqtyń rýhyn kóterýge tyrysatyny anyq. Bul týyndymnyń ózegi – osy», deıdi Kamıl Mýllashev.
О́lim qushaǵyn beınelegen susty jaǵyndylar men ómirdiń jalyndaǵan boıaýlary birimen-biri shendesip, adamzat balasy aıaldar tusqa deıin jalǵasa beretin eń úlken kúres ómir úshin arpalys ekenin eriksiz moıyndatady. Osy kúıdi áldılep otyryp, Muqaǵalıdyń myna bir joldary oıymyzǵa oraldy:
«Jaryq dúnıe-aı!
Jaryǵyń netken jaqsy edi?
Jańylyspaspyn, jarym dep aıtsam naq seni.
Qushaqqa syısań, qushyrym qanyp óber em,
Qushaqtap turyp óler em.
Jaryq dúnıe-aı,
janym-aı netken ǵajapsyń!
Ǵajapsyń shirkin!
Amal ne, tezsiń azaqsyń».
Sýretshi ómirdiń quny sýretteýge sóz jetpeıtin, ýaqyt shegine baǵynbaıtyn, júrekpen sezip, jan dúnıeńmen ǵana túısinetin jaryq nur dep aıtqysy keletindeı. Sharyqtap sóıleseń de, elge des bermeseń de, osynaý uly zańdylyqqa shúbásiz baǵynatynyńdy baıyptap jetkizedi.
«Atalǵan shyǵarma tek qylqalam týyndysy emes, jannyń aınasy ispetti. Kenepke úńilgen saıyn tirshiliktiń mánin, adam bolmysynyń tereńdigin sezinip, óz ómirińe jańasha kózqaraspen qaraısyń. Munda fıgýralardyń ornalasýy men qımyl-qozǵalysy úlken mánge ıe. Iilgen deneler, eńkeıgen bastar, sozylǵan qoldar – osynyń bári ólimniń aýyrlyǵyn, osynaý muńnyń salmaǵyn kórsetedi. О́mirge degen qushtarlyqtyń sheksizdigi men ólimniń yzǵaryn sýretker sheber úılestirgen» deıdi ónertanýshy Nurlan Asqaruly.
«О́mir úshin kúres» kartınasy – adamzat balasy jańa múmkindikterdi ıgergenimen, eń izgi qundylyqtardan ajyrap bara jatqanyn aıtqysy keletindeı. Úmitti pendege jiger berip, ómirdiń ısin sezýge, ómirdi súıýge úndeıdi! Muqaǵalısha aıtsaq: «О́mir deıtin – taǵatsyz bir qozǵalys, О́mir deıtin – ólemin dep qaramaý».
ALMATY
