Tutas sáýlet kompozısııasy 30-jyldardyń ortasynda Qıyr Shyǵystan kúshpen jer aýdarylǵan koreı ultynyń ókilderine kómek qolyn sozǵan qazaq halqynyń meıirbandyǵyn beınelegen.
Bıiktigi – 4,7 metr, eni 4,5 metr bolatyn sáýlet óneri aq qustyń aıshyqty qanattarymen kómkerilgen dóńgelekpen órnektelgen. Tóbesin kıiz úıdiń shańyraǵy japqan. Jer shary beınesindegi dóńgelektiń ortasynda qazaq áıeli balasyn arqasyna tańyp alǵan káris áıeline qymyz quıylǵan tostaǵan usynyp tur. Eki áıel de – ulttyq kıimde. Músindik kompozısııanyń túsi – kúrish dáni tárizdes aqshyl-surǵylt.
Qazirgi ýaqytta Aqtóbe oblysynda 90-nan asa etnos ókilderi turady. Sondaı-aq óńirde QHA 115 múshesi bar. Oblystyq QHA quramyndaǵy 17 etnomádenı birlestik ókilderi qoǵamdaǵy máselelerge belsene aralasady. Olar otbasy qundylyǵy jóninde bilim berý uıymdarynda kezdesýler ótkizip, qıyn jaǵdaıda qalǵan jas otbasylarǵa jıi kómektesedi.
