Atalǵan jarysta jalǵyz altyndy Jámılıa Baqbergenova oljalady. Qatysýshylar sanynyń azdyǵynan 72 kg salmaq dárejesindegi básekeler aınalmaly júıe boıynsha ótti. Tusaýkeser kezdesýinde Eýropa chempıonatynyń tolyq júlde jıyntyǵynyń ıegeri, ýkraınalyq Alla Belınskaıadan basym túsken ol kelesi beldesýde Aleksandre Iýnıs Glaýdenge jol berdi. Odan keıin Panamerıka oıyndarynyń eki dúrkin kúmis júldegeri, argentınalyq Lında Machýkýdy jyqqan Jámılıa Albanııadaǵy reıtıngtik jarystyń jeńimpazy atandy.
Asa aýyr salmaqta saıysqa túsken Elmıra Syzdyqova reseılik Valerııa Trıfonova men rýmynııalyq Aleksandra Andjelıdi aıqyn basymdyqpen utqanymen, jartylaı fınalda AQSh-tyń ókili Dımon Gýılfordtan aılasyn asyra almady. Al qola medal úshin saıysta Elmıra qytaılyq Iаnlanniń qos jaýyrynyn jerge qadady.
Erkin kúres sheberleriniń jarysynda 86 kg salmaqtaǵy Bolat Saqaev pen Rústem Myrzaǵalıev qana jeńis tuǵyryna kóterile aldy. Alǵashqy aınalymdarda óziniń komandalyq áriptesi Danııar Qaısanov pen qyrǵyzstandyq Muhamad Abdollaevty jeńgen Bolat jartylaı fınalda grýzııalyq Tarıel Gaphrındashvılıdi jolynyn yǵystyrdy. Fınalda amerıkalyq Chandler Marstellerge ese jibergen ol kúmis medaldi moınyna ildi. Al Rústem úshinshi oryn úshin básekede polshalyq Sebastıan Iаzerjanskıdi oısyrata utty.
Grek-rım kúresi sheberleri Tıranadaǵy týrnırdi úsh qolamen qorytyndylady. Ol júldeniń ıegerleri – Erasyl Mamyrbekov pen Ersin Abıyr (55 kg) jáne Baǵdat Sabaz (67 kg). Bir qýantarlyǵy, úshinshi oryn úshin tartysta qandastarymyz óz qarsylastaryn bas kótertpeı utty. Atap aıtsaq, Erasyl albanııalyq Endı Mýkany, Ersin qyrǵyz Ulan Muratbekulyn jáne Baǵdat qytaılyq Lı Leıdi erkin eńserdi.
