Foto: Aqorda
Qasym-Jomart Toqaevqa ótken jyly ónerkásip óndirisi 8 paıyzǵa, qurylys jumystarynyń kólemi 28 paıyzǵa jáne turǵyn úıdi paıdalanýǵa berý kórsetkishi 30 paıyzǵa óskeni jóninde baıandaldy.
Oblys ákimi Dastan Ryspekovtiń aıtýynsha, byltyr óńirge 226 mıllıard teńgeden astam ınvestısııa tartylǵan. Onyń 89 paıyzy – jeke ınvestısııa. Jalpy somasy 940 mıllıard teńge bolatyn ınvestısııalyq pýl jasaqtaldy. Bıyl quny 138 mıllıard teńgeni quraıtyn 17 jobany iske asyrý josparlanyp otyr. Bul oraıda qurylys, saýda, logıstıka, energııanyń balama kózderi jáne týrızm salalary ınvestısııa tartýǵa aıtarlyqtaı tartymdy dep tanylǵan.
Memleket basshysyna jylytý maýsymynyń barysy jáne «Taza Qazaqstan» ekologııalyq aksııasyn ótkizý jaıynda málimet berildi.
Prezıdentke qaterli óndiris oryndarynda eńbek etetin azamattardyń qaýipsizdigin saqtaý baǵytynda buǵan deıin bergen tapsyrmasyna saı atqarylyp jatqan jumystar týraly baıandaldy. Tıisti sharalardy ákimdik Úkimetpen birlesip júrgizip jatyr. Dastan Ryspekov «Qazaqmys» korporasııasynyń kenishinde taıaýda bolǵan apat saldarynan qaza tapqan shahterlerdiń otbasylaryna qandaı kómek kórsetilip jatqanyn aıtty.
Qasym-Jomart Toqaev bıznestiń áleýmettik jaýapkershiligin arttyrý úshin jer qoınaýyn paıdalanýshy iri kompanııalarmen jumysty jalǵastyrýdyń mańyzdy ekenin atap ótti.
Oblys ákimine kólik-logıstıka áleýetin arttyrý, ınfraqurylymdy jańǵyrtý, sapaly medısınalyq qyzmet kórsetý, halyqty taza aýyzsýmen qamtamasyz etý jáne ekologııalyq máselelerdi sheshý jóninde tapsyrma berildi.
