Foto: Májilistiń baspasóz qyzmeti
Búginde jasóspirimderdiń 74 paıyzy - TikTok-ty, 59 paıyzy – YouTube-ty, 57 paıyzy – Instagram-nyń turaqty qoldanýshysy. Al árbir besinshi ata-ana balasynyń áleýmettik jelide qandaı habar jarııalaıtynynan beıhabar. Ata-analardyń 62%-y balalarynyń ekran aldyndaǵy ýaqytyn baqylaý úshin eshqandaı arnaıy baǵdarlama men shekteý qoldanbaıtynyn alǵa tartqan Májilis depýtaty jeli jastar arasyndaǵy depressııany kúsheıtinin aıtyp, saýal joldady.
«Jelige jelikkender psıhologııalyq, fızıkalyq, áleýmettik qıyndyqqa tap kelýde. Mysaly, Gonkong Qytaı ýnıversıtetiniń zertteýleri boıynsha, ınternetke táýeldi jasóspirimder arasynda psıhologııalyq aýytqýlarǵa tap bolý kórsetkishi 2,5 ese joǵary. Depressııaǵa shaldyǵý yqtımaldyǵy 3 ese kóp bolady eken. Búginde áleýmettik jelini shektep jatqan elder az emes. Olardyń qataryna Qytaı, Ońtústik Koreıa, Fransııa, AQSh, Avstralııa jáne taǵy basqa damyǵan elderdi jatqyzýǵa bolady», dep mysal keltirgen Jarqynbek Amantaıuly máseleni zańnamalyq negizde sheshýdi usyndy.
«Birinshi, elimizdiń Oqý-aǵartý, Mádenıet jáne aqparat jáne Sıfrlyq damý, ınnovasııalar jáne aeroǵarysh ónerkásibi mınıstrlikteri vedomstvaaralyq top quryp, áleýmettik jelilerdiń óskeleń urpaqqa tıgizetin zııanyn jan-jaqty saraptap, saralap, arnaıy zań jobasyn ázirleýi qajet. Ekinshi, áleýmettik jeliler men onlaın oıyndardy paıdalaný boıynsha jas shekteýlerin engizý, sondaı-aq, kámeletke tolmaǵandarǵa gadjetterdi paıdalaný ýaqytyn belgileý boıynsha tıisti usynys ázirlenýi kerek. Úshinshi, ata-analar úshin balalarynyń ınternet álemindegi is-áreketterin, ótkizgen ýaqytyn qadaǵalaýǵa múmkindik beretin biryńǵaı memlekettik baqylaý júıesin qurýdy usynamyn», dedi depýtat.
Májilismen mundaı tájirıbeni Qytaı jáne Fransııa úkimeti qoldanysqa engizgenin atap ótti. Al Ońtústik Koreıa men Kanada ondaǵan saýyqtyrý ortalyǵyn ashyp, zamanaýı gadjetterge táýeldilerdi saýyqtyrýdy qolǵa alǵanyn tilge tıek etip, munyń aldyn alýǵa shaqyrdy.
