Foto: N.Baıbýlın
Máýlen Áshimbaev Folker Frobartty EQYU-nyń Astanadaǵy baǵdarlamalar keńsesiniń basshysy retindegi mıssııasynyń sátti aıaqtalýymen quttyqtap, oǵan Qazaqstan men Uıym arasyndaǵy yntymaqtastyqty nyǵaıtýǵa qosqan úlesi úshin alǵys bildirdi.
Sondaı-aq Palata Spıkeri Qazaqstan EQYU-ny halyqaralyq qaýipsizdiktiń qazirgi kelbetin qalyptastyratyn negizgi ınstıtýt retinde qarastyratynyn jáne syndarly ózara is-qımyldy, onyń ishinde parlamentaralyq baılanystardy odan ári damytýǵa múddeli ekenin atap ótti.
Senattyń baspasóz qyzmetiniń málimdeýinshe kezdesý barysynda taraptar ekologııa, klımattyń ózgerýi, transshekaralyq ózender, sýarý, sý resýrstaryn tıimdi paıdalaný salalaryna qatysty óńirdegi ózekti máselelerdi talqylady. Máýlen Áshimbaev atap ótkendeı, bul baǵyt Memleket basshysynyń erekshe nazarynda tur.
Sonymen qatar suhbat kezinde turaqty ekonomıkalyq ósý, adam quqyqtaryn qamtamasyz etý isindegi yntymaqtastyq, zań ústemdigi, sıfrlandyrý, sybaılas jemqorlyqqa qarsy kúres jáne basqa da salalardaǵy birlesken jumystyń mańyzdy baǵyttary talqylandy.
Folker Frobart óz sózinde elimizde iske asyrylyp jatqan saıası jáne áleýmettik-ekonomıkalyq ózgeristerdi joǵary baǵalap, aldaǵy ýaqytta Qazaqstan men EQYU arasyndaǵy yntymaqtastyq odan ári nyǵaıa túsetinine senim bildirdi.
