Damırdiń tehnologııalarǵa qyzyǵýshylyǵy bala kezinen bastalypty. Keıin osy qabiletin shyńdap, IT álemine aıaq basqan.
«Kishkentaı kezimde úıdegi magnıtofon, DVD sııaqty túrli tehnıkany bólshektep, olardy zertteýge qyzyǵatynmyn. Elektronıka men konstrýktor oıynshyqtardan jańa nárse qurastyrýǵa áýestendim. Al ýnıversıtetke túsken soń robottehnıkamen tanysyp, bul salaǵa degen qyzyǵýshylyǵym odan saıyn arta tústi. Sheteldik onlaın kýrstarǵa qatysyp, Almaty men Astanada ótken jarystarǵa baryp, tájirıbe jınaqtadym. Osylaısha, robot qurastyrý men ony baǵdarlamalaýdy birshama meńgerip qaldym. Árıne, alǵashqy kezderi qoǵamǵa paıdasy zor jobalar jasadym dep aıta almaımyn. Jańadan bastaǵandar sekildi, men de aldymen qarapaıym qozǵala alatyn, kedergiden aınalyp ótetin nemese qoqys jınaıtyn robottar jasap kórdim. Sodan keıin baryp mańyzdy jobalarǵa kóshtim», deıdi ol.
Osylaısha, stýdent kezinen-aq kompıýter baǵdarlamalaryn jazýǵa daǵdylanǵan Damır ýaqyt óte tanystaryna IT álippesin jeke-jeke úırete bastaıdy. Keıin sol isiniń aıasyn keńeıtkisi keledi. «Qulannyń qasynýyna myltyqtyń basylýy» degendeı 2019 jyly áleýmettik joba jarııalanyp, Damır sol saıystan bir mıllıon teńge utyp alady. Sóıtip bul qarajatqa kishigirim kabınet jaldap, úsh noýtbýk pen úsh robottehnıka jınaǵyn satyp alyp, «Future-IT» mektebiniń jumysyn bastap ketedi.
«Ol jyldary Taldyqorǵanda robottehnıkany úıretetin ortalyqtar, jalpy bul sala onsha damymaǵan edi. Sáıkesinshe, kelgen oqýshy da az boldy. Alǵashqyda mektebimizde tek 5-6 bala oqydy. Keıin tájirıbe jınap, tanyla bastaǵan soń qyzyǵýshylar da kóbeıdi. Qazir kýrsqa 180-ge jýyq bala qatysady. Olar turaqty túrde halyqaralyq olımpıadalar men baıqaýlarda baq synyp, júldeli oralyp júr. Karantınde onlaın jumysqa kóshtik, biraq robottehnıkany qashyqtan úıretý múmkin emes. Sebebi bala jabdyqtardy qolmen ustap, ózi robot jasaýy kerek. Karantınniń basynda 300-ge jýyq balany tegin oqyttyq», deıdi Damır.
Jalpy, robotqa baǵdarlama engizbese, ol túkke jaramsyz sývenır bolyp qalady. Sol sebepti bul ortalyqta balalarǵa eń áýeli mehanızm túrlerin, baǵdarlamalaýdyń negizderin úıretedi. 5-8 jastaǵylar «Lego Wedo» jınaǵymen, 8-12 jastaǵy balalar «Lego»-nyń úlken túrimen, 12 jastan asqandar «Arduino» baǵdarlamasymen robot jasap úırenedi. Bir modýl úsh aıǵa sozylady. Ony támamdaǵan oqýshy kelesi kezeńge kóshedi.
«Qazir ustaz qyzmetinde júrsem de, qoǵamǵa paıdaly robottehnıka jasaý týraly maqsatymdy umytqan joqpyn. Mysaly, qazirgi ýaqytta oqýshylarymmen birge zaǵıp jandarǵa arnalǵan bilezik jasap jatyrmyz. Bir joly mektebimizge kórý qabileti nashar áldebir azamat keldi. Áńgime arasynda dalada únemi taıaq ustap júrý qıyn ekenin aıtty. Aldynan shyǵatyn kedergiler týraly aqparat berip, eskertip turatyn qurylǵy oılap tabýymyzdy ótindi. Biz birden aqyldasyp, oqýshylarmen arnaıy qurylǵy jasaýǵa kiristik. Negizi shetelde mundaı qurylǵylar bar, biraq olardyń quny bir mıllıon teńgege jetedi. Árıne, ondaı baǵadaǵy zatty ekiniń biri ala almaıdy. Sol sebepti biz úsh metrge deıingi kedergini anyqtaıtyn, oǵan jaqyndaǵan saıyn diril tolqyny artatyn qoljetimdi bilezik jasap jatyrmyz», deıdi ol.
Iá, Damır Nurkejanovtyń ómiri men qyzmeti kóptegen adamǵa úlgi bolarlyqtaı. Onyń tabandylyǵy, eńbeksúıgishtigi jáne úlken maqsattarǵa umtylysy jastarǵa jiger beredi. Ol óziniń fızıkalyq shekteýlerin kedergi emes, múmkindik retinde qarastyryp, armanyna jetýdiń jolyn tapty. Qazirgi tańda Damırdiń mektebi talaı balaǵa sıfrlyq daǵdylardy úıretip qana qoımaı, olardyń synı oılaý, shyǵarmashylyq jáne ınjenerlik qabiletterin damytyp, zamanaýı tehnologııalardy meńgerýge kómektesip keledi.
