Halyqaralyq ınjenerlik-tehnologııalyq ýnıversıtetiniń (METU ýnıversıteti) rektory, Ulttyq ınjenerlik akademııanyń korrespondent-múshesi Gúlnar Sársenbekova forýmǵa stýdenttik ózin-ózi basqarý ınstıtýttarynyń kóshbasshysy bolǵan, búginde jetistikke jetken jas mamandar, ǵalymdar, bıznes ókilderi shaqyrylǵanyn jetkizdi. Rektordyń aıtýynsha, stýdenttik kóshbasshylyq bolashaqqa umtylysty bildiredi. Al halyqaralyq keńistikte suranysqa ıe kásibı maman bolý úshin bilimdi jetildirýmen qatar rýhanı qundylyqtardy ıgerý, ekologııalyq turaqtylyq, «jasyl ekonomıka», jasandy ıntellekt sııaqty basymdyqqa ıe salalardy ıgerý qajet. Bıyl ýnıversıtettiń belsendi stýdentteri usynysymen «О́zin-ózi basqarý jyly» jarııalandy. Osy baǵytta eńbek adamdaryn qoldaý jáne stýdentter bastamasyna demeý kórsetetin jobalar bastalǵan.
Qazirgi tańda atalǵan oqý ornynda Mysyr, Mońǵolııa, Qytaı, Túrkııa, Reseı, Marokko, О́zbekstan, Qyrǵyzstan sııaqty 10-nan astam eldiń stýdentteri bilim alady. Jyldan-jylǵa halyqaralyq yqpaldastyq nyǵaıyp, bilim almasý jobalaryna basymdyq berilip otyr.
Forýmǵa Ońtústik Kalıfornııa Los-Andjeles ýnıversıtetinen respýblıkalyq «Jas ulan» balalar jáne jasóspirimder uıymynyń alǵashqy jetekshisi, PhD Nazıra Bóltirikova qatysyp, kóshbasshylyq tájirıbesimen bólisti. «Stýdent kezimde erteńgi kún búginnen bastalatynyna mán bermeppin. Oqýymdy bitirip alaıyn, jumysqa turaıyn dep kóshbasshylyqty keıinge qaldyra beretin edim. Qandaı ortada júrseńiz de, sol ortany jaqsartýǵa tyrysý mańyzdy ekenin keıin túsindim. Bizdiń stýdent kezimizde de ózin-ózi basqarý uıymy boldy. Kóptegen talqylaý nátıjesiz qalatyn sııaqty kórinetin. Biraq ýaqyt óte kele túsingenim, dál osy uıym bolashaǵymyzǵa úlken áser etti. Biz ýnıversıtettiń sheshimine yqpal etýdi úırendik. Máselen, kóptegen stýdenttiń áleýmettik máselelerine jańashyldyq ákeldik. Úlken jetistik osylaısha qarapaıym ádetterden bastalady», dedi ol. Onyń aıtýynsha, ozyq tehnologııany ıgere otyryp, óz ortańdy jaǵymdy ózgeristerge bastaýda batyldyq qajet.
Adam kapıtaly taqyrybyn zerttep júrgen jas ǵalym, PhD Alııa Qaraqojaeva jumys ónimdiligi, jahandyq básekege qabiletti túlek atrıbýttaryna toqtalyp, óz tájirıbesin aıtty. Onyń pikirinshe, kásibı jetistikter irgetasy ýnıversıtette, ózin-ózi basqarý uıymynda qalyptasqan. Al básekege qabilettilik til tabysýǵa beıim, jańasha oılaýmen tyǵyz baılanysty.
Sonymen birge jıynda stýdent Metı-Korlı Isaak Opar (Gana memleketi), Glazgo ýnıversıteti «Adam Smıt» bıznes mektebiniń oqytýshysy, PhD Baqyt Tólegenov, Reseı bıotehnologııa ýnıversıtetiniń professory Tatıana Danılchýk, Almaty oblysy Kegen aýdandyq máslıhatynyń tóraǵasy Almasbek Nuǵman, Almaty qalasy Jastar saıasaty bóliminiń bastyǵy Dıdar Dildábek, taǵy da basqalar kóshbasshylyq týraly oı-pikirlerimen bólisip, usynystaryn ortaǵa saldy.
Sondaı-aq forýmda stýdentter bastamasymen jaryq kórgen, ýnıversıtet ómirinen aqparat taratatyn «METU life» jýrnaly tanystyrylyp, bilim alýshylardy jan-jaqty damytý jáne quzyrettiligin qalyptastyratyn áleýmettik GPA baǵalaý quraly tanystyryldy. Oǵan stýdentterdiń barlyq jetistigi men kórsetkishi engizilip, jyl sońynda úzdik stýdentter marapattalady.
Al jıyn barysynda ashylǵan kitap almasý buryshyna rektordan bastap oqytýshylar men stýdentter kitap syılady. Munymen qosa stýdentterdiń oıyn erkin jetkizýge múmkindik beretin ámbebap «Home Reading» kitaby úlestirildi. Sondaı-aq «METU» ýnıversıtetiniń 10-nan asa úzdik stýdentine kásiporyndar «Jumysqa shaqyrý» sertıfıkatyn tabystap, úzdik stýdentterge «Propanel» kásiporny shákirtaqy úlestirdi. Sonymen qatar forým aıasynda ýnıversıtettiń stýdenttik qurylys jasaǵy qurylyp, qatysýshylar arnaıy kórmeni tamashalady.
ALMATY
