Osy bilim shańyraǵyna arnaıy kelgen Oqý-aǵartý mınıstri Ǵanı Beısembaev professor-oqytýshylar jáne stýdenttermen kezdesip, sapaly kadrlar daıarlaý, bilim baǵdarlamalaryn jetildirý, sonymen qatar úzdiksiz pedagogıkalyq bilim salasyn damytý barysyn talqylady.
Mınıstr sózinde pedagogıkalyq mamandyqtarǵa bólinetin memlekettik grant sanynyń jyl saıyn artyp kele jatqanyn aıtty.
«Memleket tarapynan pedagog kadrlardyń sapasyn arttyrýǵa erekshe mán berilip otyr. Sonyń bir dáleli, keıingi ýaqytta úsh birdeı ustaz Qazaqstannyń Eńbek Eri atandy. Bul – memleket pen Prezıdenttiń ustazdarǵa degen joǵary seniminiń aıǵaǵy. Pedagogtiń basty ustanymy – shákirtterine sapaly bilim men sanaly tárbıe berý deıtin bolsaq, elimizdiń bilim oshaqtarynda eńbek etip jatqan muǵalimder osy ýnıversıtet túlekteri Aıagúl Mırazova men Gúljanar Nurpeıisovadaı pedagogıkalyq qyzmettiń bıik shyńyna jetkenin qalaımyz», dedi Ǵ.Beısembaev.
Aıtalyq, keıingi jyldary zertteý jumystarymen aınalysatyn pedagogterdiń úlesi 1,6 esege ósip, magıstr dárejesi bar muǵalimder sany 25 myńnan asqan.
Kezdesý barysynda stýdentter mınıstrge aýyldyq jerlerde pedagogterdi qoldaý, jumysqa ornalasý, ata-analar qaýymdastyǵymen baılanys, «Birtutas tárbıe» baǵdarlamasy aıasyndaǵy tárbıe jumysyna qatysty suraqtar qoıdy.
Sondaı-aq osy kezdesý aıasynda Qazaq ulttyq qyzdar pedagogıkalyq ýnıversıtetinde elimizdiń úzdik pedagogteriniń qurmetine «Ult kelbeti – ustazdar» atty fotogalereıa ashyldy. Onda otandyq bilim salasyna zor úles qosqan kórnekti ustazdardyń shyǵarmashylyǵy aıshyqty beınelengen. Olardyń qatarynda Sosıalıstik Eńbek Eri, qazaq tili men ádebıeti pániniń muǵalimi Marjan Tasova, Qazaqstannyń Eńbek Eri, bıologııa pániniń muǵalimi Alına Soloveva, sondaı-aq Qazaqstannyń tuńǵysh Eńbek Eri Aıagúl Mırazova bar.
«Fotogalereıa – barlyq ustazǵa degen qurmettiń belgisi. Biz ótkenimizdi bilmesek, bolashaǵymyzdy baǵdarlaı almaımyz. Muǵalimniń júregi de, sózi de jyly bolýy kerek. Ustaz bolý – úlken jaýapkershilik. Sol jaýapkershilikti abyroımen atqarǵan jan ǵana naǵyz ustaz bolady», dedi Aıagúl Mırazova.
Is-shara sońynda Oqý-aǵartý mınıstri ǵylym men urpaq tárbıesi jolynda jemisti eńbek etip júrgen bir top ustazdy marapattady.
ALMATY
