Biraz jyl buryn ashylǵan Asanáli Áshimov atyndaǵy shyǵarmashylyq ortalyǵynda jumys qarqyny ilki sátke de báseńsigen emes. Yqylas Dúkenuly atyndaǵy qalalyq mádenıet úıinde ornalasqan ortalyqtyń jumys aýqymy keń. Munda áıgili óner tarlanyna tıesili qundy qujattar men teatr sahnasynda, kınodaǵy negizgi rólderin somdaǵan kezde paıdalanǵan buıymdary saqtalǵan.
Ortalyqtyń aýyr jumysyn názik ıyǵymen eńserip júrgen Janat Toqbanbetovanyń qolǵa alǵan, atqarar sharýasy jeterlik. Onyń aıtýynsha, ortalyqqa óner álemine ańsary aýǵan shahar turǵyndary ǵana emes, óńirdiń ár qıyrynan kelgen azamattar jıi bas suǵady. Áıgili akter álemimen tanysýǵa kelgenderdiń ishinde jasóspirimder men baldyrǵandar da bar.
«Áýeli qarjy jáne nesıe mamandyǵymen joǵary oqý ornyn bitirdim. Keıinnen burynǵy Taraz Memlekettik pedagogıkalyq ınstıtýtynda tarıhshy mamandyǵy boıynsha bilimimdi jetildirdim. Bastapqyda shalǵaıdaǵy Moıynqum aýdanynda alǵashqy mamandyǵymmen jumys istedim. Shyǵarmashylyqqa jaqyn bolǵan soń ba, áıteýir ózime qazir istep júrgen jumysym unaıdy. Birshama ýaqyttan beri Asanáli Áshimov atyndaǵy shyǵarmashylyq ortalyǵynda eńbek etip júrmin. Ilgeride «Dańq» zalynda tájirıbe jınaqtaǵanymnyń paıdasy tıip jatyr. Ortalyqtyń ǵylymı qyzmetkeri retinde bizge kelgen qonaqtarǵa qolda bar derekter men qundylyqtar negizinde ekskýrsııa júrgizemin. Asanáli aǵamyz bizge jıi at basyn burady. Ol kisi tapsyrǵan jádigerlerdi qabyldap alý mindeti de maǵan júktelgen», deıdi Janat.
Ortalyq ǵylymı qyzmetkeriniń aıtýynsha, onyń jumysy ekskýrsııa júrgizý, jádigerlerdi qabyldap alýmen bitpeıdi. Turaqty túrde ǵylymı zertteý jumystarymen de aınalysady. О́ıtkeni ortalyqqa kelgen túrli sanattaǵy azamattar tarapynan qoıylatyn saýal jetkilikti. О́ner tarlanyna qatysty týyndaǵan kez kelgen suraqqa múdirmeı jaýap berý – Janattyń mindeti. Sondyqtan da udaıy izdenis ústinde júredi.
«Bizge kelgen azamattardyń ishinde Asaǵańnyń jeke ómirine qatysty saýal qoıatyndar kóp. Áıgili tulǵa bolǵan soń, ol kisiniń ómirine qatystynyń bári qyzyq. Munda saqtalǵan qundy jádigerlerdiń tarıhyn da bilgisi keledi. Mundaıda bizdiń múdirip qalýǵa qaqymyz joq. Men munda ǵylymı qyzmetker retinde eńbek etetindikten, ortalyq jumysy týraly turaqty túrde jergilikti basylymdarǵa maqalalar jazyp turamyn. Kóbine jazǵan-syzǵanym oblystyq «Aq jol», «Araı» gazetterinde jarııalanady. Maqala jazý men án aıtý – súıikti hobbıim, ortalyq jumysyn BAQ betinde nasıhattaý men úshin qıyndyq týdyrmaıdy», deıdi keıipkerimiz.
Taraz qalasynda ornalasqan Asanáli Áshimov atyndaǵy shyǵarmashylyq ortalyq kózge shaǵyndaý kóringenimen, munda úsh qyzmetker tynymsyz eńbek etedi. Derekqordy tolyqtyrý, túrli is-sharalar ótkizý mindetiniń bir bóligi Janat Toqbanbetovaǵa júktelgen. Ol ári kópbalaly ana, jary Jandarbek ekeýi tórt balany baǵyp-qaǵyp, otbasynyń berekesin keltirip otyr. Al ortalyq jumysyn jandandyrýǵa barynsha úles qosyp júrgen keıipkerimizdi ortalyqtyń shyraqshysy dese de bolady.
TARAZ
