Sáýle Musaeva Almaty tehnologııalyq ınstıtýtyn bitirip, ınjener-tehnolog mamandyǵyn alǵan. Eńbek jolyn ınjener bolyp bastaǵan. Keıin ekonomıst, fabrıka dırektory qyzmetin atqaryp, zeınetkerlikke shyqqan. Alaıda úıde otyrǵandy jón kórmeıdi.
«Bala kezimde kólik júrgizýge qyzyǵýshylyǵym oıanǵan edi. Alǵashqy kóligimdi 1998 jyly satyp aldym. Sodan beri birnesheýin aýystyrdym. Zeınetke shyqqannan keıin Maqat aýdanyndaǵy kólik júrgizý mektebinde sabaq berdim», deıdi S.Musaeva.
Tájirıbesi mol júrgizýshi kólikti óte saq júrgizedi. Jol ústinde jyldamdyqty asyrmaıdy. Jaıaý júrginshilerge jol beredi. Rýlde otyrǵanda telefondy qolyna ustamaıdy. Tipti telefonyna qońyraý kelip tursa da alańdamaıdy.
«Kólik júrgizý – tek rýldi ustap, gaz basý emes. Bul – úlken jaýapkershilik. Keıbir júrgizýshiler asyǵyp, jol erejesin elemeıdi. Jolda ár sekýndtyń mańyzdy ekenin eskerý qajet. Bolmashy qateliktiń sońy orny tolmas ókinishke, tipti qaıǵyly jaǵdaıǵa soqtyrýy múmkin. Sondyqtan árdaıym ereje saqtaımyn. О́zgelerge de osyny keńes retinde aıtyp júremin», deıdi ol.
Zeınetker júrgizýshiniń pikirinshe, ár júrgizýshi joldaǵy qaýipsizdikti saqtaýǵa mindetti ekenin umytpaǵany jón. Jol erejesin saqtaý arqyly óziniń de, ózgelerdiń de ómirin saqtaıdy.
Maqat aýdandyq polısııa bóliminiń ýchaskelik ınspektor, polısııa maıory Saıfolla Qapanovtyń aıtýynsha, Sáýle Musaeva – aýdandaǵy eń úlgili júrgizýshilerdiń biri. Ony jergilikti turǵyndar jaqsy tanıdy.
«Aýdan turǵyndary Sáýle apaıdyń uqyptylyǵy men sabyrly minezin joǵary baǵalaıdy. О́ıtkeni birde-bir ret jol erejesin buzǵan emes. Mundaı tájirıbeli júrgizýshiler jas býynǵa úlgi bolýǵa tıis. Kóktem merekesi qarsańynda apamyzdy arnaıy quttyqtap, alǵysymyzdy bildirdik», dedi S.Qapanov.
Atyraý oblysy
