Akademık Naılıa Bazanova – Qazaqstan men Ortalyq Azııa kóleminde áıelder arasynan shyqqan tuńǵysh akademık. Sondaı-aq ol qazaq áıelderi arasynan shyqqan alǵashqy bıologııa ǵylymynyń doktory, professor, Qazaq KSR Ǵylym akademııasynyń akademıgi, Qazaqstannyń eńbek sińirgen ǵylym qaıratkeri.
Prezıdent janyndaǵy UǴA prezıdenti, akademık Aqylbek Kúrishbaev ǵalym arýlardy 8 naýryz halyqaralyq áıelder merekesimen quttyqtap, olardyń el ǵylymyn damytýǵa qosqan úlesin atap ótti.
– Memleket basshysynyń bastamasymen Ádiletti Qazaqstan qurýdy aldymyzǵa maqsat etip qoıyp otyrmyz. Osy keshendi jospardyń ishinde áıelderdiń ǵylym salasyn damytýdaǵy alar orny erekshe bolmaq. Aldymyzda qanshama jaýapty mindet tur. Prezıdent «Áıel – ómir tiregi ǵana emes, ómirdiń ózi» deı otyryp, áıelder eńbegin laıyqty baǵalaý, ana men otbasyn qorǵaý, rýhanı qoldaý – memlekettik saıasattyń altyn arqaýy ekenin árqashan atap aıtyp keledi. О́tken bir jyldyń ishinde qanshama jas ǵalym qyzdarymyz Memleket basshynyń tapsyrysymen páter aldy. Sonymen birge stıpendııa, grant ıegeri atandy. Bul úrdis áli de jalǵasady dep senemiz. Kóktem merekesi – barsha názik jandylarǵa degen sheksiz súıispenshiliktiń belgisine aınaldy. Halqymyzda «Ata uldy, ana ultty tárbıeleıdi» degen qanatty sóz beker aıtylmaǵan. Qoǵamda áıelder keńinen aralasqan salada jeńis te, jemis te qatar júredi, – dedi UǴA prezıdenti.
Mazmundy sharaǵa ǵylymdy damytýǵa aıryqsha úles qosyp júrgen 400-ge jýyq jetekshi áıel-ǵalymdar, ǵylymı qyzmetkerler, oqytýshylar men joǵary oqý oryndarynyń, ǵylymı uıymdardyń basshylary qatysty. Ǵalym áıelderge arnalǵan akademık N.Bazanova atyndaǵy marapat otandyq ǵylymnyń damýyna aıryqsha úles qosyp, ǵylymnyń ártúrli baǵyttarynda úzdik nátıje kórsetip júrgen 48 ǵalymǵa tabys etildi. Marapatqa laıyqty úmitkerler ýnıversıtetter men ǵylymı-zertteý ınstıtýttary ujymdarynyń usynystary boıynsha anyqtalǵan. Olardyń qatarynda «Qazaqstandyq ǵalym áıelder qoǵamy» birlestiginiń tóraǵasy, fılologııa ǵylymdarynyń doktory, professor Tanat Aıapova, S.Asfendııarov atyndaǵy QazUMÝ birinshi prorektory, medısına ǵylymdarynyń doktory, professor Dılıara Qaıdarova, Q.Sátbaev atyndaǵy QazUTZÝ professory, tehnıka ǵylymdarynyń doktory Marjan Nurpeıisova, Ahmet Baıtursynuly atyndaǵy Til bilimi ınstıtýtynyń bas ǵylymı qyzmetkeri, fılologııa ǵylymdarynyń doktory, professor Jamal Mankeeva, Semeı medısına ýnıversıtetiniń professory Lıýdmıla Karajanova, H.Dosmuhamedov atyndaǵy Atyraý ýnıversıtetiniń professory Sofııa Saǵyndyqova jáne basqalar bar.
Búginde elimizde ǵylymmen aınalysyp júrgen áıelder arasyndaǵy zertteýshi mamandar 12 myńǵa jýyqtady. Bul jalpy ǵalymdar sanynyń 55,6 paıyzyn quraıdy. Ǵylymı dáreje qorǵaǵan názik jandylar qatary jyl saıyn ósip keledi. Bıylǵy kórsetkish boıynsha áıelder arasyndaǵy ǵylym doktorlary – 848, ǵylym kandıdattary – 2 872, PhD – 1 806-ǵa jetti.
UǴA derekteri boıynsha, byltyr otandyq ǵalym áıelder «Web of Science» jáne «Scopus» jýrnaldarynda úsh myńnan astam maqala jarııalaǵan, bul kórsetkish 2023 jylmen salystyrǵanda 15 paıyzǵa artqan. О́tken jyly «Web of Science» birinshi kvartılindegi eń bedeldi jýrnaldarda jarııalaǵan maqalalar sany 500-den asty.
ALMATY
