Nápaqasyn adalynan taýyp, urpaǵyna durys tárbıe berýdi maqsat etken ana ul-qyzdyń bolashaǵyn oılap tynymsyz eńbek etti. Otaǵasy densaýlyq salasynda feldsher edi. Meıizkúl onyń kómekshisi retinde Qazyǵurt, Tóle bı aýdandarynda birneshe jyl meıirbıke bolyp halyqqa qyzmet etti. Keıinnen ýaqyt talabyna saı saýdamen de aınalysty, «Birinshi mamyr» ujymshary fermasynda saýynshy boldy. Qaı salada bolsyn eńbekqorlyǵymen el alǵysyna bólengen, bes ul, bes qyz tárbıelegen Meıizkúl Muzdybaeva «Batyr Ana» atandy, «Ana dańqy» ordenimen nagradtaldy. Búginde 28 nemere, 18 shóbere súıip áje atanǵan Meıizkúl Muzdybaeva sol bir kúnderi bar qıyndyqty sábıdiń kúlkisi umyttyryp jiberetinin aıtady. О́tkendi eske alǵannan góri nemere-shóbereleriniń tátti qylyǵyn áńgimeleýdi jón kóredi.
«Ol kezde eshkim balanyń betine qarap otyrmaıtyn. Kúı talǵamaı-aq, úıdiń de, túzdiń de sharýasyna úlgere júrip ósirdik. Bes ul, bes qyzǵa dana Abaı aıtqandaı, «beınet kórmeı, dáýlet joq» ekenin uǵyndyrdyq. Bel jazbaı eńbek etip, úlgi kórsettim. Qıyndyqqa moıymaı, aldyma bir ǵana maqsat pen mindet qoıdym. Ol – balalarymdy aıaqqa turǵyzý, solardy adam etý. Osy oıdyń jeteginde júrip, aıanbaı eńbek etip, eńserýge tyrystym. Búginde zaman basqa, degenmen nemere-shóberelerime Abaıdyń: «О́zińe sen, ózińdi alyp shyǵar, Eńbegiń men aqylyń eki jaqtap» degen, naqylǵa aınalǵan óleń joldaryn jıi qaıtalap otyramyn. Olar da aqynnyń jyryn jatqa aıtyp, tereń túsinetinin bildirip jatady. Qazir 1-2 bala týyp, úı-kúı izdeıtin jastardyń da az emes ekeni ras. Búginde sol kóp balany bergen jaratqanǵa shúkir etemin. Barlyǵynyń qatardan qalmaı, tarshylyq kórmeı, joǵary bilim alyp, ómirden óz ornyn tabýyn maqsat ettim, osy jolda qolymnan kelgenshe kómektestim, qoldadym. Sonyń rahatyn búginde kórip kelemin. Qolymdy jyly sýǵa malyp otyr. Qartaıǵanda beınetimniń zeınetin kórýdemin. On balanyń basy qosylyp, nemere-shóberelerim jınalyp jan-jaqtan qaýmalaǵanda aıtyp jetkisiz baqytty kúı keshemin. Shúkir, birligi men yntymaǵy jarasqan otbasymyz. El tynysh, jurt aman, aýylda halyqqa barlyq jaǵdaı jasalyp jatyr, uzaǵynan bolǵaı», deıdi altyn qursaqty ana.
Ekinshi dúnıejúzilik soǵys kezinde dúnıege kelgen Meıizkúl 16 jasynda Tóle bı babanyń tikeleı jetinshi urpaǵyna kelin bolyp túsken. Iаǵnı Tóle bıdiń altynshy urpaǵy Nurtaı, jetinshi urpaǵy Muzdybaı babalardyń tárbıesin alǵan kelin. Nemereleri ájeleri qazirgi kúnge deıin «Uly dala zańy» men «Qazaqtyń ataly sózin», ulttyq qundylyqtarymyzdy dáriptep otyratynyn aıtady. 82 jasqa tolǵan Meıizkúl áje shıraq, aýyl-aımaqta ótetin is-sharalarǵa, qoǵamdyq jumystarǵa belsendi aralasady. Mektepte «Qyz ádebi anaǵa syn» taqyrybynda ótetin, urpaqty ulttyq qundylyqtar sheńberinde tárbıeleý maqsatyndaǵy is-sharada belsendi.
«Uldyń úlkeni alpysqa keldi. Ul-qyzdarymnyń barlyǵy joǵary bilim aldy. О́z bilimimen, óz kúshterimen oqydy. Bári adal eńbegimen urpaq tárbıelep, úlken otbasyna aınalyp otyr. Otaǵasy máńgilik mekenine qaıtqanda besikte jatqan kenje qyzym qazir 41 jasta, sot júıesindegi basty tulǵa sanalatyn sýdıa bolyp eńbek etedi. Nemeremniń úlkeni orda buzar otyzdan asyp qaldy. Eń kishkentaı shóberem 6 aılyq. Naýryzdaǵy meıramymyzben barlyǵy quttyqtap, qýantyp turady. Ul-qyzdarym, nemerelerim meniń jyldar boıǵy eńbegimniń bir óteýi retinde desem de bolar, eki ret Mekkege qajylyqqa jiberdi. Rızamyn. Aýyldyń ákimi de, aýdan basshylary da umytqan emes, jyl saıyn qurmet kórsetip otyrady. Men úshin barlyq ul-qyzym, kelinderim, kúıeý balalarym birdeı, jaqyn, ystyq, bárin jaqsy kóremin. Bóle-jarǵan emespin. Nemere-shóberelerimniń arasynda ónerge jaqyny da az emes. Mysaly, ekinshi uldyń nemeresi, ıaǵnı shóberem Dinmuhammed Qaıratbekuly dombyra tartady, túrli dodada jeńimpaz atanyp ta júr. Qolymdaǵy nemerem Eńlik Shymkenttegi joǵary oqý ornynda, úshinshi kýrsta oqıdy, dombyra tartady, án shyrqaıdy. Maǵan tartqan-aý dep topshylap qoıamyn. Meniń de án aıtatyn ónerim bar, – dedi de Meıizkúl áje bizge halyq ánin aıtyp berdi.
On segiz shóbereniń qolynan maı jalaǵan baqytty áje shyrqaǵan ánniń ádemi áýenine elitip, janymyz jadyrady.
Túrkistan oblysy
