«Jetigenshiler baıqaýy balalar arasynda jıi bolyp júr, biraq eresek oryndaýshylar arasynda respýblıka kóleminde birinshi bolyp ótkizip jatyrmyz. Aýdan ákimdigi júlde qoryna 1 mln teńge qarjy bóldi. Bilýimshe, kóne aspap HIH ǵasyrdyń ortasyna deıin jetken. Odan keıin qoldanystan shyǵyp qalǵan. Elimiz táýelsizdik alǵan tusta etnograftardyń aıtýymen jetildirilgen túri qaıta jasalyp, úlken sahnalardan kórine bastady. Bizdiń aýdannyń turǵyndary jetigen únin alǵash ret 2020 jyly estidi. Aýdan ákiminiń qoldaýymen jergilikti úsh ónerpazymyz Almatyǵa baryp, Qurmanǵazy atyndaǵy ulttyq konservatorııada Nurgúl Jaqypbekten tálim aldy», deıdi Fedorov aýdandyq mádenıet jáne tilderdi damytý bóliminiń basshysy Danııar Sársenbetov.
Baıqaý aıasynda Almaty qalasynan qazylar alqasynyń tóraıymy retinde arnaıy shaqyrtylǵan kásibı maman Nurgúl Jaqypbek óńir oryndaýshylaryna jetigenniń kóne buraý ádisterinen sheberlik saǵatyn ótkizdi.
«Jetigenniń sazdy áýeni tyńdaýshynyń júregin birden baýrap alatyn sebebi – bul aspap ulttyq jadymyzda qalǵyp jatqan eski áýenderdi oıatady, halyqtyń baı tarıhynan syr shertedi. Baıqaýǵa qatysqan úmitkerlerdiń bári shet óńirde jetigendi nasıhattap, dáriptep júrgen sanaýly ónerpazdardyń qatarynan», deıdi Nurgúl Jaqypbek.
Saıys qorytyndysynda ónerpazdar baıqaýynyń bas júldesin Fedorov aýdandyq mádenıet úıiniń qyzmetkeri, besaspap ónerpaz Farıza Jolamanova jeńip aldy. Al Meńdiqara aýdanynan kelgen Gúljan Nurmuhambetova birinshi orynnan kórindi. Sarykól aýdanynyń ókili Rysjan Birjanqyzy men Altynsarın aýdanynyń ónerpazy Altynaı Tólegen ekinshi, úshinshi oryndardy ózara bólisse, Fedorov aýdanynan qatysqan Dınara Myrzahmetova oblystyq kórkemónerpazdar ortalyǵynyń arnaıy syılyǵyna ıe boldy.
Uıymdastyrýshylar kelesi jyly jetigenshilerdiń respýblıkalyq baıqaýyn uıymdastyrýdy kózdep otyr.
Qostanaı oblysy
