Sport • 12 Naýryz, 2025

Jarys kúndeligi

60 ret

kórsetildi

2 mın

oqý úshin

Sporttyq gımnastıkadan Bakýde ótken álem kýboginde elimizdiń quramasy úsh júlde oljalady. Erkin jattyǵýda Mılad Karımı belarýstik Egor Sharmakovtan qalyp qoıyp, kúmis medaldy ıelense, brýsıada japonııalyq Kazýkı Masýmıdi alǵa jibergen Dmıtrıı Potanın dál sol mejeden kórindi. Zeınolla Ydyrysov at jattyǵýynda qolaǵa qol sozdy. Taǵy bir aıta keterlik jaıt, qolda tirep jattyǵýynda 49 jastaǵy О́zbekstannyń ókili Oksana Chýsovıtına altynnan alqa taqty. Sóıtip, segiz Olımpıadaǵa qatysqan jer-jahandaǵy jalǵyz gımnasshy taǵy bir rekordty jańartty.

Ǵalym SÚLEIMEN

Londonda tennısshilerdiń Devıs kýboginiń jerebesi tartyldy. I álemdik topta óner kórsetetin jerlesterimiz Ońtústik Koreıamen sheberlik baıqasady. Básekeler qyrkúıek aıynda ótedi. Osyǵan deıin qos komanda ózara eki márte kezdesti. 2007 jyly koreıler 5:0 esebimen oısyrata utsa, arada úsh jyl ótkende jerlesterimiz qarsylasyn dál sondaı eseppen jeńdi.

Fýtboldan 2026 jyly jalaýy jelbireıtin dúnıejúzilik dop dodasynyń irikteý týrnıri aıasynda elimizdiń quramasy aldaǵy kúnderi syrt alańda eki kezdesý ótkizedi. Álı Álıev jattyqtyratyn komanda 22 naýryzda Ýelske, 25 naýryzda Lıhtenshteınge qarsy oınaıdy.

Fýtboldan elimizdiń premer-lıgasynyń ekinshi týry myndaı nátıjelermen aıaqtaldy: «Oqjetpes» – «Atyraý» 2:1, «Jetisý» – «Ulytaý» 0:0, «Jeńis» – «Tobyl» 0:0, «Qaırat» – «Ordabasy» 4:0, Aqtóbe» – «Turan» 2:1, «Elimaı» – «Qaısar» 2:0, «Qyzyljar» – «Astana» 0:2.

Qazaq parabıatlonshysy Erbol Hamıtov Shvesııada shymyldyǵy túrilgen álem kýbogi kezeńiniń jeńimpazy atandy. Ol 7,5 shaqyrymdyq sprınterlik saıysta dara shyqty. Kúmis, qola medaldar Ýkraına sportshylary Pavlo Bal men Aleksandr Aleksıkke buıyrdy.

Fransııada «Parıj-Nıssa» kópkúndigi ótip jatyr. 16 naýryzǵa deıin sozylatyn jarysta «Astananyń» namysyn Keıs Bol, Kleman Shampýssan, Anton Charmıg, Evgenıı Fedorov, Harold Tehada, Maık Tıonıssen, Nıkolıa Vınokýrov syndy veloshabandozdar qorǵaıdy.