Sýretterdi túsirgen – Jangeldi ÁBDIǴALYM
Forýmda «Qazaqstan halqy Assambleıasyna 30 jyl» eskertkish taqtasy saltanatty túrde ashyldy. QHA-nyń óńirdegi tóraǵasy, aımaq basshysy Ermaǵanbet Bólekpaev Memleket basshysy Qasym-Jomart Toqaevtyń quttyqtaý hatyn oqyp, forýmǵa qatysýshy qaýymdy mereıli merekemen quttyqtady.
– Biz alǵashqylardyń biri bolyp Qazaqstan halqy Assambleıasynyń 30 jyldyǵyn merekeleýdi bastadyq. Assambleıa qurylǵan jyldarynda bizdiń qoǵamymyzdyń mańyzdy býynyna aınaldy. Bul ózara qurmetke, yntymaqtastyqqa jáne qoldaýǵa toly jol boldy. Jaqynda ǵana ótken «Aqsaqaldar keńesi» respýblıkalyq forýmynyń qoǵamdyq jáne azamattyq sektor tarapynan joǵary baǵalandy. Tuǵyrly tatýlyǵymyz ben yrysty yntymaǵymyzdy jańa beleske jeteleıtin, birligimizdi bekemdeıtin mundaı mańyzy bar is-sharalardy jıi ótkizýimiz qajet, – dedi E.Bólekpaev.
Buǵan qosa óńir basshysy oblystaǵy etnomádenı birlestikterdiń Qazaqstan halqy Assambleıasynyń 30 jyldyǵyna arnaıy uıymdastyrǵan «Birlikpen gúldengen Saryarqa» kórmesin barlyq qala, aýdandy aralap, kóshpeli etip uıymdastyrýdy tapsyrdy.
Alqaly jıynda assambleıa músheleri «Qaıyrymdylyq kerýeni» atty aksııasynyń bastaý alǵanyn málimdedi. Igilikti sharýa birden qoldaý tapty. Oblystaǵy túgelge jýyq etnomádenı birlestik ókilderi muny jyly qabyldady. Máselen, Balqash qalasynyń Analar keńesiniń tóraǵasy Almıra Mýsına «Qaıyrymdylyq kerýeni» aksııasy aıasynda keńes ókilderimen qaladaǵy perzenthana baryp, Alǵys aıtý kúni týǵan balalardy quttyqtap, syılyq tabystap shyqqandaryn aıtty. Qaraǵandy oblysynyń koreı etnomádenı birlestiginiń tóraıymy Lılııa Kım de Qaraǵandy qurylys-tehnıkalyq kolledjiniń 4-kýrs stýdenti Muhametáli Isaıynǵa álem chempıonatynda baq synaý úshin demeýshilik kómek kórsetilgenin jetkizdi. «О́mir tynysy» qoǵamdyq birlestigi transplantasııalanǵan naýqastardyń tóraǵasy Jánibek Ýspanov donorlarǵa adam ómirin saqtaýǵa qosqan baǵa jetpes úlesteri úshin alǵys bildirdi. «Vaınah» sheshen-ıngýsh etnomádenı birlestiginiń tóraǵasy Ývaıs Djanaev etnomádenı birlestikter basshylarynyń atynan qonaqjaı qurmeti úshin qazaq halqyna alǵys aıtty.
Sonymen qatar forýmda oblystyq QHA belsendileri oblys ákiminiń Alǵys hattarymen marapattaldy. «Namýs» Ázerbaıjan ulttyq-mádenı ortalyǵynyń tóraǵasy Gıýlaga Vekılogly Rzaev – marapattalǵandardyń biri. Ol ázerbaıjan halqynyń qıyn qystaý kezeńi – keńes tusyndaǵy deportasııany esine salyp, baýyrmal qazaq jurtyna rızashylyq bildirdi.
Dostyqty tý etken jıyn etnomádenı birlestik ókilderi men forýmǵa qatysýshylardyń Táýelsizdik stellasyna gúl shoqtaryn qoıý rásimimen jalǵasty.
Qaraǵandy oblysy
