Prezıdenttiń Baspasóz hatshysy Rýslan Jeldibaı bul oqıǵany elimizdiń syrtqy saıasatta qol jetkizgen úlken jetistigi ekenin atap ótti.
«Bul – elimizidiń syrtqy saıasattaǵy aıtýly jetistigi. Prezıdent Qazaqstannyń bastamasyn qoldaǵany úshin barlyq seriktesimizge rızashylyq bildirdi. Memleket basshysynyń pikirinshe, BUU-nyń Aımaqtyq haby halyqaralyq is-qımyldy úılestirýdiń mańyzdy alańyna aınalady», dep jazdy R.Jeldibaı.
Al jýyrda osy jaǵymdy jańalyqtan keıin kóp uzamaı-aq Ortalyq Aýǵanstandaǵy turaqty damýǵa baǵyttalǵan bıdaı ósirý jobasy iske qosyldy. Iаǵnı Aýǵanstandaǵy turaqty aýyl sharýashylyǵyn damytý jolynda mańyzdy qadam jasaldy. Bul habardy Azyq-túlik qaýipsizdigi jónindegi Islam uıymy taratty.
Logar provınsııasynyń ákimshilik ortalyǵy Pýl-ı-Alam qalasynda «Ortalyq Aýǵanstanda turaqty damýǵa baǵyttalǵan bıdaı ósirý» jobasynyń resmı ashylý saltanaty ótti. Joba Túrkııanyń Yntymaqtastyq jáne úılestirý agenttigi (TIKA) men Azyq-túlik qaýipsizdigi jónindegi Islam Uıymynyń (IOFS) qoldaýymen júzege asyrylyp, Kabýl jáne onyń mańyndaǵy osal qaýymdastyqtardyń aýyl sharýashylyǵyn damytý men azyq-túlik qaýipsizdigin qamtamasyz etýge baǵyttalyp otyr. Jobanyń ashylý rásimine elimizdiń Kabýldaǵy ýaqytsha senimdi ókili Ǵazız Aqbasov ta qatysty.
Bul bastama Aýǵanstannyń azyq-túlik qaýipsizdigi baǵdarlamasynyń (AFSP) mańyzdy bóligi bolyp otyr. Baǵdarlama 2021 jyldyń jeltoqsanynda Islamabadta ótken Aýǵanstandaǵy gýmanıtarlyq jaǵdaı jónindegi Islam yntymaqtastyǵy uıymy (IYU) Syrtqy ister mınıstrleri keńesiniń (CFM) 17-tótenshe otyrysynda qabyldanǵan qarar negizinde iske asyrylyp jatyr.
Joba aıasynda Barkı Barak, Muhammed Aga jáne Pýl-ı-Alam aýdandaryndaǵy 300 fermerge 15 tonna joǵary sapaly (Lalmı jáne Ámir sorttary) bıdaı tuqymy taratyldy. Sonymen qatar topyraqtyń qunarlylyǵyn arttyrý úshin 15 tonna DAP tyńaıtqyshy jáne 30 tonna nesepnár (karbamıd) tyńaıtqyshy berildi. Sondaı-aq aýyl sharýashylyǵyn uzaqmerzimdi damytý maqsatynda jergilikti fermerlerge tuqym saqtaýdyń tıimdi ádisterin úıretetin oqytý kýrstary ótkizile bastady. Bul bastama usaq sharýashylyqtar úshin úlken kómek boldy.
Jergilikti fermer Abdýl Matın Ezattı jobaǵa alǵysyn bildirip, onyń mańyzdylyǵyn atap ótti.
«Byltyr astyq ónimdiligi óte tómen boldy. Al sapaly tuqymǵa qol jetkizý qıyn edi. Fermerler bir-birimen tuqym almastyrýǵa májbúr boldy. Al búgin bizge berilgen tuqym bıylǵy eginnen úmittenýge múmkindik beredi», deıdi fermer.
Ashylý rásiminde jobanyń maqsaty men aldaǵy jospary tanystyrylyp, birqatar resmı tulǵalar sóz sóıledi. Olardyń qatarynda Qazaqstannyń Kabýldaǵy ýaqytsha senimdi ókil Ǵazız Aqbasov, Túrkııanyń Kabýldaǵy mıssııa basshysynyń orynbasary Bılal Emre Bıral, TIKA-nyń Kabýldaǵy úılestirýshisi Fazyl Akın Erdoǵan jáne IYU-nyń Kabýldaǵy ókilderi boldy. Olar azyq-túlik qaýipsizdigin nyǵaıtý, aýyldyq aımaqtardy qoldaý jáne ekonomıkalyq turaqtylyqty arttyrý úshin birlesken kúsh-jigerdiń mańyzdylyǵyn atap ótti.
Resmı is-shara barysynda sertıfıkattalǵan tuqymdar men tyńaıtqyshtar 300 fermerge berildi. Fermerler naýryz aıynda egýdi bastap, maýsym aıynyń sońynda egin jınaýdy josparlap otyr. Joba IOFS, TIKA jáne Azııadaǵy ózara is-qımyl jáne senim sharalary jónindegi keńes (CICA) tarapynan qarjylandyrylyp iske asyryldy. Aýǵanstannyń azyq-túlik qaýipsizdigi baǵdarlamasy aıasynda bolashaqta IYU jáne basqa da beıtarap uıymdarmen áriptestikti keńeıtý josparlanǵan eken. Jobanyń basty donorlary – IOFS-tyń shtab-páteri ornalasqan Qazaqstan jáne Túrkııa.
