Soltústik Qazaqstan soty úkimdi ózgerissiz qaldyrdy

PETROPAVL. 19 maýsym. Aýyr qylmys jasaǵany úshin bas bostandyǵynan aırylǵan Aqjar aýdandyq ishki ister bólimi basshysynyń orynbasary men aýyldyq ýchaskelik polıseıge taǵaıyndalǵan jaza ózgerissiz qaldy. Bul týraly oblystyq sottyń baspasóz qyzmeti habarlady. Oqıǵa ótken jyly bolǵan. Mıy shaıqalyp, aýrýhanaǵa túsken er adamnyń jaǵdaıyn kórgen medbıkeler birden polısııaǵa habar bergen.  Alaıda, jábirlenýshini soqqyǵa jyqqan kúdikti tabylysymen is zańǵa qaıshy baǵytta órbı bastaǵan. Sotta belgili bolǵandaı aýdandyq ishki ister bólimi basshysynyń tergeý jónindegi orynbasary K. Daıyrov pen ýchaskelik polıseı Q.Úsenov kúdiktini aldap-qorqytý arqyly qomaqty qarajatqa kenelmek bolǵan. Olar ony qylmystyq jazadan bosata alatyndaryna sendirip, “qaıyrymdylyq” qyzmetin 300 myń teńgege baǵalaǵan. Qolyna kisen salynyp, temir torǵa toǵytylatynyn estigen kúdiktiniń kelispeske amaly qalmaǵan. Sharasyz kúıge túsken aýyl turǵyny sybaılas jemqorlyqqa qarsy kúres bólimi qyzmetkerlerine qaırylýǵa májbúr bolǵan.  Q.Úsennov tıisti aqshany alý ústinde quryqtalǵan. Bul kezde K.Daıyrov áriptesin janar-jaǵarmaı quıý stansııasynyń janynda kútip turǵan. Sot úkiminde kórsetilgendeı K.Daıyrov kinásin moıyndamaǵan. Al Q.Úsenov onyń bastamasy boıynsha qylmysty jasyrý faktisin áshkerelemek bolǵan kórinedi. Oblystyq appelıasııalyq sot alqasy aýdandyq sottyń K.Daıyrovty – 4 jylǵa, Q.Úsenovti 3 jylǵa bas bostandyǵynan aıyrý týraly úkimin qaraı kelip, ózgerissiz qaldyrdy. О́mir Esqalı. Derek: Soltústik Qazaqstan oblystyq sotynyń baspasóz qyzmeti. Derek: egemen.kz