Alǵashqy kúni Alýa Balqybekova (50 kg) kenııalyq Veronıka Mbıte Nzıvamen kúsh synasty. Bul básekede bizdiń boksshynyń basymdyǵy aıqyn baıqaldy. Úshinshi raýndta ol qarsylasyn nokdaýnǵa jiberdi. Eldana Tálipova (+81 kg) ózbekstandyq Oltın Sotımbaevaǵa san soqtyrdy. Shırek fınalda Eldana byltyr qurlyq birinshiliginde úzdik úshtikti túıindegen serbııalyq Sara Mılkovıchpen kúsh synasady.
Ekinshi kúngi saıysta alǵashqy bolyp rıngke kóterilgen Anıta Ádisheva (52 kg) meksıkalyq Patıno Hýarezden jeńildi. Jaına Shekerbekovanyń (54 kg) qarsylasy bolıvııalyq Bekera Montesınos jekpe-jekke shyǵýdan bas tartty.
Jarystyń úshinshi kúni bes birdeı jerlesimiz jarys kórigin qyzdyryp, tórteýi jeńiske jetti. Alýa Balqybekovanyń (50 kg) álem chempıonatynyń qola júldegeri, Afrıkanyń úsh dúrkin chempıony, marokkolyq Iаsmın Mýtakıden mereıi ústem boldy. Vıktorııa Grafeeva (60 kg) grekııalyq Sofııa Legakıge san soqtyrdy. Aıda Ábikeeva (63 kg) qytaılyq Shýoıý Chjady qapy qaldyrdy. Jasmın Kızatova (66 kg) Kabo-Verdeniń ókili Ivanýsa Moreıranyń osal tusyn ońaı tapty. Jaına Shekerbekova (54 kg) Meksıkanyń myqtysy Arıadna Janet Hıl Alonsonyń tas-talqanyn shyǵardy. Tek Gúlsaıa Erjan (81 kg) Qytaı eliniń taǵy bir boksshysy Van Sıaoǵa ese jiberdi.
Keshe Nazym Qyzaıbaı (48 kg), Karına Ibragımova (57 kg), Natalıa Bogdanova (70 kg), Nadejda Rıabes (75 kg) sharshy alańǵa shyqty. Búgin Eldana Tálipovanyń (+81 kg) ónerin tamashalaımyz.
