Alqaly jıynnyń tizginin Til bilimi ınstıtýtynyń dırektory, fılolog-ǵalym Anar Fazyljan ustady. Ol Shora Shamǵalıulynyń qazaq dıalektilerin túgendep, onyń dıalektologııalyq qory men tuńǵysh dıalektologııalyq sózdigin jasaǵan eńbegin erekshe atap ótti.
«Bul eńbekter ózektiligimen óte qundy. Suranysqa da ıe. Sondyqtan aıtýly akademıktiń ǵylymǵa sińirgen eńbegi eshqashan el jadynan umytylmaıdy. Onyń esimi ǵylym men rýhanııatymyzdyń altyn qoryna jazyldy», dedi A. Fazyljan.
Kórnekti ǵalymniń kózi tirisinde dıalektologııa, leksıkologııa jáne altaı tilderiniń tarıhyn zerttep, 20-dan astam monografııa jazyp, 300-den astam ǵylymı maqalasy jarııalanǵan. Bul eńbekteriniń deni ózbek, arab, qyrǵyz, tatar, túrik tilderine aýdarylǵan.
Jıyn barysynda ǵalymnyń uly, Azııadaǵy ózara is-qımyl jáne senim sharalary keńesiniń bas hatshysy, elshi Qaırat Sarybaev ákesi týraly jyly estelik aıtty. Baýyrlas memleketterden kelgen ǵalymdar akademık shyǵarmashylyǵy týraly parasatty oı qozǵady. Sondaı-aq akademıkter Z.Bazarbaeva, K.Qurmanálıev, professorlar Q.Kúderınova, N.Ýálı, J.Mankeeva, E.Omarov, M.Malbaqov jáne taǵy basqa ǵalymdar «Ǵylymnyń óshpes shyraǵy», «Akademık Shora Sarybaev: ulttyq qundylyqtar máseleleri», «Shora Sarybaev jáne qazaq dıalektologııasy» atty taqyryptarda baıandama jasap, ǵalymnyń ónegeli ómirinen syr shertti. Akademıktiń qyzy, professor Maıra Sarybaevanyń «Fılologtiń álemi: Shora Sarybaev» atty kitaby tanystyryldy. «Kel, sóz marjanyn jınaıyq» taqyrybynda ótken baıqaýdyń qorytyndysy jarııalandy. Sonymen qatar is-shara aıasynda «Til taǵdyry jáne ǵalym ulaǵaty» taqyrybynda kórme uıymdastyrylyp, oǵan ǵalymnyń jınaǵan jeke kolleksııalary men sýretteri, qoljazbalary, kitaptary qoıyldy.
Aldaǵy ýaqytta A.Baıtursynuly atyndaǵy Til bilimi ınstıtýty akademıktiń týǵanyna 100 jyldyǵyna oraı halyqaralyq kongress ótkizýdi josparlap otyr. Onda ǵalymnyń tiltanymdyq murasy, til ǵylymynyń qazirgi fılologııa, túrkologııa men dıalektologııanyń ózekti máseleleri talqylanbaq.
Elvıra BО́KENBAEVA,
jýrnalıst
ALMATY
