Jastar jyl basynan beri el aýmaǵynda ondaǵan reıd ótkizgen. Sonyń nátıjesinde, 100-den asa quqyq buzýshylyqtyń joly kesildi. Keshki jáne túngi ýaqytta belsendiler túngi jáne kompıýterlik klýbtar men túrli kóńil kóterý oryndaryn aralady. Máselen, Pavlodarda «Jastar rýhy» ókilderi polısııa qyzmetkerlerimen birge qaladaǵy kompıýterlik klýbtarǵa reıd júrgizdi. Onyń barysynda jasóspirimderge qatysty túsindirý jumysy júrgizilip, kásipkerlerge kámeletke tolmaǵandardyń 22.00-den keıin mundaı nysandarda bolýyna tyıym salynǵany eskertildi.
Al aqtóbelik jasóspirimniń 18 jastaǵy aǵasymen birge kompıýterlik klýbtardyń birinde otyrǵany anyqtaldy. Ata-anasyna ákimshilik shara qoldanylyp, klýb ıesi jaýapqa tartyldy.
Astanadaǵy belsendiler polısııa departamentimen birlesip satýshylardy synap kórdi. Kámeletke tolmaǵan jigit jasyryn kameramen birneshe dúkenge kirip temeki jáne alkogoldik ishimdik satyp alýǵa tyrysty. Zańdy belshesinen basyp, qujat suramaı taýar satqandar, tipti veıp pen nasybaıdy ashyq saýdalaǵandary da kezdesken. Jaýapsyz kásipkerlerge profılaktıkalyq jumys júrgizilip, keıbireýi ákimshilik jaýapkershilik arqalady.
О́skemendegi jastar polısııa qyzmetkerlerimen birge kafe, meıramhanalardy aralady. Biraq tekserý barysynda eshqandaı zań buzýshylyq tirkelgen joq. Uıymdastyrýshylardyń aıtýynsha, qoǵamdyq tamaqtaný oryndarynyń basshylary óz bedelin joǵary baǵalaıtyndyqtan, kúmándi jaǵdaıda kelýshilerdi ábden tekseretin kórinedi.
– Naýqan eń aldymen, balalardyń qaýipsizdigin, olardyń qaýipsiz ortada ósýin qamtamasyz etýdi kózdeıdi. «Jastar rýhy» jalpy áleýmettik máselelerdi sheshýde eshqashan tys qalǵan emes. Aksııa barysynda azamattardyń qaýipsizdigi úshin qala aýmaǵyndaǵy ashyq jatqan lıýkterge, aýlalardyń jaryqtandyrylýy, úı jaǵdaıynda gaz balondarynyń durys ornalasýy, kámelet jasqa tolmaǵan balalardyń túngi ýaqytta oıyn-saýyq mekemelerinde bolýyna reıd jumystary júrgizilip jatyr. О́ńirlerde oryn alǵan keleńsiz oqıǵalardy eskere otyryp, mundaı aksııalar sol jaǵdaılardyń sanyn azaıtyp, oń nátıje kórsetýine yqpal etedi degen oıdamyz. Qoǵam men memlekettiń birlesken kúshimen ǵana jastardy qaýipti jaǵdaılardan qorǵap, quqyqtyq mádenıeti joǵary qoǵam qura alamyz. Monıtorıng nátıjesi boıynsha arnaıy usynym hattar daıyndalyp, tıisti organdarǵa joldanady, – deıdi «Jastar rýhy» jastar qanatynyń tóraǵasy Aqerke Iskanderova.
Memleket basshysy quqyq qorǵaý organdarynyń basshylarymen keńeste «Zań jáne tártip» qaǵıdatyn ustaný qoǵamnyń ıdeologııalyq jáne saıası nusqaýlyǵyna aınalýy qajet ekenin basa aıtqan. Sondaı-aq Prezıdent «Adal adam – Adal azamat – Adal tabys» atty Ulttyq quryltaıdyń úshinshi otyrysynda «El ishindegi tártipke ár otandasymyz jaýapty» degen edi. Bul baǵytta «Qaýipsiz qala» aksııasy óz úlesin qosyp jatyr. О́ıtkeni naýqan kámeletke tolmaǵan jetkinshekterdiń quqyqtyq mádenıeti men jaýapkershiligin arttyrýǵa, ata-analarǵa balalaryn zańǵa qurmetpen qaraýǵa tárbıeleýge úgitteıdi.
Negizinen aksııa jasóspirimderdi jazalaýǵa emes, olardy qaýipti áreketterden qorǵaýǵa, reıd kezinde túsindirý jumystaryna kóbirek zeıin qoıady. Demek mundaı is-sharalarǵa tek eriktiler men polısııa qyzmetkerleri ǵana emes, sonymen qatar ákimdik ókilderi, máslıhat depýtattary men qoǵam tirshiligine beıjaı qaramaıtyn janashyr turǵyndar qatysa alady.
Ázirge «Jastar rýhy» belsendileri kúndizgi reıd jumystaryn kópqabatty úıdiń aýlalarynda, saıabaqtar men qala kóshelerinde jalǵastyryp júr. Bul ýaqytta belsendiler aýlalardyń jaryqtandyrý deńgeıin, ashyq jatqan lıýkter men synǵan áınekterdiń bar-joǵyn, balalar alańdaryndaǵy qaýipsizdik jaǵdaıyn jiti tekseredi. Jumys nátıjesinde anyqtalǵan olqylyqtar kommýnaldyq qyzmet ortalyqtaryna habarlanady. Ilkimdi bastama jyl boıy jalǵasady.
