Ardaq Sársenbaevanyń ómiri – erik-jiger men eńbekqorlyqtyń jarqyn úlgisi. Jigerli jas 1990 jyly Qostanaı oblysy Naýyrzym aýdany Qarameńdi aýylynda dúnıege kelgen. Otbasyndaǵy úsh balanyń ortanshysy. Bala kezde jáı ǵana sýyq tıip aýyrǵan ol salǵyrt emniń áserinen tutastaı estý qabiletinen aıyrylǵan.
Taǵdyr taýqymetine qaramastan ata-anasy Ardaqty qaladaǵy estý qabileti buzylǵan balalarǵa arnalǵan ınternatqa oqýǵa beredi. Sóıtip, ol ózi sekildi qatarlastarymen birge ym-ıshara tilin meńgeredi. Bul orta oǵan senimdilik pen ómirlik daǵdylardy qalyptastyrýǵa septesedi.
– Mektepti aıaqtaǵan soń qyzmet kórsetý salasy mamandyǵy boıynsha Qostanaıdaǵy kolledjge oqýǵa tústim. Keıin ony bitirgen soń, qarapaıym jumysshy maman retinde eńbekke aralastym. Biz sekildi azamattarǵa eki qolǵa bir kúrek tabý, qoǵamǵa beıimdelý ońaı emes. Dese de ómir jolymda kezdesken túrli qıynshylyqqa moıynsunbadym, meni tek alǵa qaraı senim jeteledi. Sodan 2014 jyly taǵdyrlas azamatqa turmysqa shyqtym. Bizdiń mahabbatymyzdan kishkentaı Iаsmına jaryq dúnıe esigin ashty. Dekrettik demalysymdy da tekke ótkizbedim. Qolónermen aınalysyp, túrli tapsyrys qabyldadym. Araǵa ýaqyt salyp, 2017 jyly qyzymdy balabaqshaǵa ornalastyryp, ózim tiginshi bolyp jumysqa turdym. Maǵan qolynan is keletin, qımyly shıraq, qansha aýyrtpalyq bolsa da júzinen kúlki ketpeıtin jandar unaıdy, – dedi keıipkerimiz.
Úshinshi top múgedegi Ardaqtyń qolǵanaty búginde 10 jasta. Osydan eki jyl buryn ekeýi elordaǵa qonys aýdardy. Munda da úkimettiń bergen járdemaqysyna alaqan jaıǵan joq. Bastapqyda jaldamaly jumysta tiginshi bolyp eńbek etti. Keıin armany jetelep, óz kásibin ashýǵa nıettendi. Sóıtip, Astanadaǵy jumyspen qamtý ortalyǵyndaǵy mamandardyń aqyl-keńesine júginip, «enbek.kz» platformasy arqyly oqýǵa den qoıdy. Jeke bıznes josparyn jasaqtap, qaıtarymsyz negizdegi memlekettik grantqa ótinish tapsyrdy. Izinshe joba maquldanyp, Ardaq azyn-aýlaq qarajatpen óziniń tigin sheberhanasyn ashty.
– Memleket bergen qarjyǵa arnaıy oryndy jalǵa aldym. Tigin mashınasy, kerekti qural saımandary taǵy bar. Kásipti júrgizý men ony ilgeriletýdiń óz qıyndyǵy bolady. Sonyń ózinde tabysym turaqty. Kóbine áıelderge arnalǵan neshe túrli kıimder tigemin. Kúndelikti piship, qysqartý jumystary da kezdesedi. Baıqaǵanym, kóp jerde sýrdoaýdarmalar bolmaıdy. Bızneste boılaýǵa kedergi keltiretin de – osy nárse. Elimizde tolyq ınklıýzıvti qoǵam quryldy deý qıyn. Degenmen ateleniń aýqymyn keńeıtip, barynsha kóp tapsyrys alýǵa talaptanyp júrmin, – deıdi ol.
Jaqsy kúnderden úmiti úzilmegen taǵy bir qaısar jan – Altynshash Muqataeva. Jas ánshi – «Parıj talanttardy tanystyrady» (Parıj, Fransııa), «Planet of arts» (Máskeý, Reseı), «Art line» (Parıj, Fransııa), «Elim, án shyrqa» (Máskeý, Reseı), «Altyn aıdahar» (Pekın, Qytaı), «Magic voice», «Icon music fest» (Sochı, Reseı), «JasSTAR» syndy halyqaralyq deńgeıdegi bedeldi konkýrstardyń jeńimpazy.
Shyǵys Qazaqstan oblysy Aıagóz aýdanynyń týmasy bala kezde dárigerler qoıǵan syrqatqa moıyǵan joq. Qolarbamen júrse de, jan-jaqty bilim alyp, ózin túbegeıli shyǵarmashylyqqa arnaıdy.
– 2011 jyly Astanadaǵy Qazaq tehnologııa jáne bıznes ýnıversıtetiniń kolledjinde dızaın mamandyǵyn meńgerdim. Sonyń arasynda Qaraqat Ábildınanyń mektep-stýdııasyna baryp, tórt jyldaı vokaldan bilim aldym. 2014 jyly Qazaq gýmanıtarlyq zań ýnıversıtetine psıholog mamandyǵyna tapsyryp, bul oqýdy da abyroımen aıaqtadym. О́mir bir ret beriledi. Ony ókinishsiz súrý, barǵa qanaǵat etip, múmkindigińdi jan-jaqty ashýǵa talpyný qajet. Meniń óner jolym bala kezden bastaý aldy. Sol kezden-aq án aıtý men sahnany súıdim, bul mahabbat meni ónerge jeteledi. Qazirgi tańda elimizdiń mádenıetin damytýǵa, ónerge úles qosýǵa kúsh salyp kelemin, – deıdi Roza Baǵlanova atyndaǵy «Qazaqkonsert» memlekettik akademııalyq konserttik uıymynyń solısi.
Byltyr ǵana keıipkerimiz «Ǵashyqpyn» atty motıvasııalyq shyǵarmashylyq keshin ótkizipti. Onda Altynshash áýezdi ánderin shyrqap, ómiri men óneri, qýanyshy men qıyndyǵy, jetistigi men jeńilisi týraly syr shertti.
Taǵdyrdyń tezine synbaǵan ol «Eren eńbegi úshin» medali men túrli Alǵyshattar ıelengen. Mádenıet salasynyń úzdigi, Tuńǵysh Prezıdent qorynyń grant ıegeri de atanǵan. Osydan-aq onyń ómirge degen qushtarlyǵyn, jigerin kórýge bolady. Bul qazirgi óz-ózin tappaı sendelip júrgenderge úlgi bolary anyq.
– О́mirde eń soraqysy aıaqtyń júrmeı, kózdiń kórmeı qalýy emes, adamgershilik turǵydan keýdesi qýys, oılary aram adamdardyń rýhanı múgedektigi. Kez kelgen isti adal, meılinshe, yqylaspen atqaratyn bolsa, shyn múgedektik dalada qalady. Jumyssyzdyq – qazirgi qoǵamnyń mańyzdy máseleleriniń biri. Biraq jastardy eńbekke baýlý úshin menińshe, sapaly bilim men tájirıbe qajet. Odan qaldy baǵyt-baǵdar berip, óz múmkindigin ashýǵa jaǵdaı jasaý mańyzdy. El jastarynyń shyǵarmashylyq jáne kásipkerlik bastamalaryn jiti qarastyryp, olarǵa qajetti resýrstardy usyný kerek. Ásirese aýyl jastarynyń damýyna qolaıly orta qalyptastyrý qajet, – deıdi taǵdyrymen talaı tyńdarmanǵa shabyt syılaǵan qaısar ánshi.
