Foto: Ashyq derekkóz
«Aýylda densaýlyq saqtaýdy jańǵyrtý» ulttyq jobasy aıasynda 188 medısına nysany salynady. Rıdderde kópbeıindi aýrýhanany, О́skemende gematologııa ortalyǵyn, Aqtaýda jedel járdem stansasyn, Almatyda Juqpaly aýrýlar ulttyq ǵylymı ortalyǵyn, Astanada Ulttyq ǵylymı onkologııa ortalyǵynyń jańa ǵımaratyn paıdalanýǵa berý qajet. 2026 jyly 32 aýdandyq ortalyq aýrýhanany jańǵyrtý, sondaı-aq Qyzylorda jáne Mańǵystaý oblystaryndaǵy aýrýhanalardy salyp bitirý kerek. Jumysty aıaqtaý merzimin buzýǵa bolmaıdy», dedi Prezıdent.
Sonymen qatar Prezıdent baspana máselesine de toqtalyp, ótken jyly áleýmettik osal toptaǵy azamattar úshin 21 myń páter satyp alynǵanyn atap ótti.
Sonymen qatar, sońǵy eki jylda Semeı, Taraz, Kentaý jáne Oral qalalarynda erekshe qajettiligi bar adamdarǵa arnalǵan ońaltý ortalyqtary ashylǵan.
«2026 jyldyń aıaǵyna deıin Aqtóbede, Atyraýda, Kókshetaýda, Shymkentte jáne Taldyqorǵanda dál osyndaı ortalyqtar ashý qajet», dedi Memleket basshysy.
Budan bólek, árbir oblys ortalyǵynda aýtızmge shaldyqqan balalarǵa arnalǵan ońaltý jáne damytý ortalyqtaryn qurý mańyzdy ekeni aıtyldy.
«О́kinishke qaraı, dúnıe júzinde osyndaı dıagnozy bar balalardyń sany jyldam ósip barady. Mundaı jaǵdaı Qazaqstanda da bar. Demeýshilerdiń jáne «Qazaqstan halqyna» qorynyń kómegimen osy mańyzdy jumysta belgili bir ilgerileý bar. Úkimet pen ákimder bul sharýany jandandyrýy qajet. Qazaqstanda erekshe qajettiligi bar árbir balanyń tolyqqandy bilim alýǵa múmkindigi bolýy kerek. Bul – óte mańyzdy másele. Sondyqtan jyl sońyna deıin osyndaı balalarǵa jan-jaqty qoldaý kórsetý isin retteıtin jańa zań ázirleý kerek», dedi Qasym-Jomart Toqaev.
