Sýret: ru.freepik.com
Jastar da bar. Biraq sol jastar egde adamdardan da mosqal kórinedi. Qaýǵa saqaldy. Al tórtinshi, besinshi synyp oqýshylary shamasyndaǵy jetkinshekter tipten kóp. Tórt dastarqan toly. Mundaı kóriniske kóz úırenbegendikten alǵashqyda tańyrqaı qaraǵanbyz. Mán-jaıdy suraý yńǵaısyz kóringen. Qapelimde kórshi otyrǵan, jergilikti jurttyń jaıyn jaqsy biletin aqsaqal qutqardy.
– Osy balalar meshitke úıir. Tipti juma namazyna sabaqtan suranyp shyǵady eken, – deıdi aqsaqal, – meniń de osylar shamalas nemerem bar. Áne bireýi nemeremmen birge oqıdy. Osy bala nemeremdi «meshitke kelseıshi» dep shaqyratyn kórinedi. Solaı sabaqtasyp, qarasy kóbeıe túsedi de. Endi ózińiz oılap qarańyzshy, osy balalarǵa qazir bilim alǵan durys emes pe? IT-tehnologııany meńgerip, álemniń damyǵan elindegi alǵyr jastar sııaqty myqty mamandyq meńgerse she? Qoǵam ósip, jetilip, kósegemiz kógermeı me? Al jastardyń júreginde ımany bolsa, eshkimniń ala jibin attamasa, adal júrip-tursa boldy emes pe?
Aqsaqaldyń áńgimesi mamyrajaı otyrǵan aǵaıyn arasyna qozǵaý saldy. Birinen soń biri osy taqyrypty qaýzap, pikirlerin bildirip jatyr.
– Bulardy qoıshy, – dedi taǵy bir aqsaqal, – anaý otyrǵan tepse temir úzetin jas jigitter ýaqytynyń kóbin osy meshittiń ishinde ótkizedi. Árıne, jaratqanǵa qulshylyq etpe, namaz oqyma demeımiz, ol árkimniń óz sharýasy, biraq besigimizdi túzeý úshin árkim tyrbanyp eńbek etýleri kerek emes pe?
Dám qaıyrardyń aldynda bastapqy lepes qaıta tutanǵan.
– Taıaýda áleýmettik jeliden tyńdadym, oqýshy balalarǵa oraza ustaýǵa bola ma degen taqyrypty taratyp aıtyp jatyr eken. Bilim salasy basshylarynyń aıtýlaryna qaraǵanda, densaýlyǵyna kinárat kelmese, qarsylyq joq eken. Deni saý bolsyn delik, al jan saýlyǵy she?
Kóptiń kókireginde júrgen alýan túrli kúrdeli oıdyń kóleńkesi bizdi de tumshalaı bastady. Shynynda da, balany ımandylyqqa kim baýlıdy?
KО́KShETAÝ
