2021 jyly qurylǵan bilim berý platformasy – CodiPlay qyzmetiniń álemde 1 mıllıonnan astam qoldanýshysy bar. Platforma Ulybrıtanııa, Ońtústik Koreıa, Túrkııa jáne Birikken Arab Ámirlikteri mektepteriniń oqý baǵdarlamasyna engen.
CodiPlay kompanııasynyń Qazaqstandaǵy keńsesiniń dırektory Alııar Kadıkenovtiń aıtýynsha, qazirgi kezde qaladaǵy 100-den astam mektepte oqýshylar sıfrlyq tehnologııalarǵa beıimdelip, jańa tehnologııanyń qyr-syryn meńgerip jatyr. Atap ótkendeı, oqýshylar óte alǵyr ári sıfrlyq jobalarǵa barynsha ıkemdi. Olar 1-synyptan-aq alǵashqy jobalaryn jasap, nátıjesin ınteraktıvti qurylǵylar túrinde baqylaýǵa mashyqtandy.
«Balalar CodiPlay jobasy aıasynda logıka men algorıtm negizderinen bastap, jekelegen ázirlemelerdi jasaýǵa alǵashqy qadamdardy úırenedi. Baǵdarlamany qabyldaýyna, deńgeıine qaramastan, materıaldy jyldam ıgerý múmkindigi basym. Nátıjesinde oqýshylar sıfrlyq ortaǵa tez beıimdelip, platformanyń ınterfeısin ońaı meńgerip, baǵdarlamalaýdy jyldam meńgerip jatyr» deıdi ol.
CodiPlay memlekettik qyzmettermen jumys jónindegi departamentiniń dırektory Nurǵalı Turymbetovtyń aıtýynsha, jobanyń basty maqsaty – oqýshylardy sıfrlandyrýǵa beıimdeý. Baǵdarlamalaý arqyly oqýshylar logıkalyq jáne kreatıvti oılaýyn, jańa tehnologııalarmen jumys isteý qabiletin damytatyn bolady. Olardyń qatarynan bolashaqtyń IT-mamandary shyǵatyny anyq. Joba barysynan ańǵarylǵanyndaı, oqýshylardyń sıfrly bilimge degen qyzyǵýshylyǵy joǵary. Biri oıyn nemese anımasııaǵa jasaýǵa beıim bolsa, endi biri sıfrlyq álemniń ózge salalaryn ıgerýge qushtar.
Atap ótkendeı, Prezıdenttiń 100 myń IT-maman daıarlaý tapsyrmasyna sáıkes CodiPlay sııaqty EdTech jobalardyń mańyzy joǵary. Mundaı kompanııalar bilim berý tehnologııalar naryǵyndaǵy básekelestiktiń artýyna yqpal etedi. Bilim berý ónimderi neǵurlym kóp bolǵan saıyn, sapaly sheshimderdiń alǵa ozyp shyǵatyny anyq. Sondyqtan kompanııa mamandary CodiPlay jobasy arqyly sapaly kontent qalyptastyryp, oqytýda joǵary tıimdilikke qol jetkizbekshi.
