Foto: polisia.kz
Shara barysynda kóshi-qon zańnamasyn buzýdyń 10 myńǵa jýyq faktisi tirkeldi. Máselen, 4,5 myń sheteldik azamat elde bolý merzimin buzǵan. 2,5 myńy zańsyz eńbek qyzmetimen aınalysqan. Onyń ishinde 60 zańsyz taksı júrgizýshisi bar. IIM buǵan deıin júrgizilgen arnaıy operasııa kezinde 700-ge jýyq zańsyz taksı júrgizýshisi anyqtalǵanyn da málimdedi. 1240 sheteldik sot sheshimimen elden shyǵarylyp, olarǵa bes jylǵa Qazaqstanǵa kirýge tyıym salyndy.
«Zań buzýshylardyń basym bóligi jaqyn shet memleketten kelgender. Biraq odan bólek Bangladesh, Egıpet, Italııa, Nıgerııa jáne Madagaskar azamattary da anyqtaldy. Izdeýde júrgen 20 sheteldik ustaldy», dedi IIM kóshi-qon qyzmeti komıtetiniń tóraǵasy Aslan Atalyqov.
Al 2200 tulǵa sheteldikterdiń kelgenin habarlamaǵany úshin ákimshilik jaýapkershilikke tartylyp, olarǵa 12 mln teńge aıyppul salyndy.
Sondaı-aq, 500 qazaqstandyq jumys berýshi sheteldikterdi zańsyz jumysqa tartqany úshin 33 mln teńge aıyppul arqalady. Olardyń ishinde bes tulǵa osyndaı áreketti buryn da jasaǵany úshin, qylmystyq jaýapkershilikke tartyldy.
«Mysaly, Astana qalasynda bir ýnıversıtet jataqhanasynda komendant 56 eńbek mıgrantyna stýdent retinde ýaqytsha turýǵa ruqsat bergen. Almaty oblysynda notarıýstyń kómekshisi sheteldikterdi «joq» mekenjaılarǵa tirkeý úshin jalǵan senimhattar rásimdegen. Barlyq faktiler boıynsha sotqa deıingi tergeý júrgizilip jatyr. Sheteldikterdiń kelýi týraly habarlama berý, jeke sáıkestendirý nómirin alý, daktoregıstrasııany ótý jáne ýaqytsha turýǵa ruqsat rásimdeý úshin memleket tólem almaıtynyn aıta ketken jón», dedi Aslan Atalyqov.
