Qazaq mádenıetinde shańyraqtyń qadir-qasıeti aıryqsha. Ol – ári aspan kúmbezi, ári úı-jaı, ári tirek, ári baı-qýattylyq pen qaýipsizdik hám urpaqtar sabaqtastyǵynyń belgisi. Ata-baba saltyndaǵy osy bir «Shańyraq kóterý» atty erekshe dástúrdi nasıhattaýdy maqsat tutqan aıtýly sharaǵa qazaqtyń Qyz Jibegi, Qazaqstannyń eńbek sińirgen ártisi, «Qurmet», «Parasat» ordenderiniń ıegeri Merýert О́tekesheva, Qazaqstannyń eńbek sińirgen qaıratkerleri Qanat pen Sveta Aıtbaevtar, sonymen qatar Astana qalasy Yryskeldi qajy meshitiniń bas ımamy, belgili dintanýshy-ǵalym Nurlan Baıjigituly qatysty. Tárbıelik máni zor taǵylymdy sharany Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri Ashat Maqsymuly tizgindedi.
«Teatr ishinde byltyrdan bastap erekshe Naýryznama bastalyp, qazaqtyń ulttyq qundylyqtaryn, rýhanı kelbetimizdi kórsetetin úlken is-sharalar ótip jatyr. Teatrymyz ashylǵaly beri tórt jarym jyl ishinde ujymymyzda 15 jup shańyraq kóterip, otbasyly boldy. Búgin, mine, taǵy bir odaq – teatrda tanysyp, tabysqan 16-jup úlken úlken ómirge qadam basqaly otyr. Ekeýine óner men ómir jolynda arman da, maqsat ta ortaq bolsyn dep tileımiz!», dep aq tilegin jetkizdi Ashat Maemırov.
Is-shara barysynda neke qııý rásimimen qatar teatr ártisteriniń oryndaýynda ásem ánder shyrqalyp, kúmbirlegen kúı tartyldy. Jas otbasyna bata berilip, aqjarma tilekter aıtyldy. Otbasylyq qundylyqtar dáripteldi. Al shańyraq kóterip jatqan Aıdos Amandyqtyń aıtýynsha, Naýryz merekesiniń jańa tujyrymdamasy aıasyndaǵy «Shańyraq kúni» keleshekte jalpyulttyq otbasylyq qundylyqtar men kirshiksiz mahabbat kúnine aınalady deýge negiz bar.
«Shańyraq kúni halqymyz jas urpaqty tárbıeleý mádenıetin kórsete otyryp, olardyń boıyna ultjandylyq men adamgershilikti qalyptastyrýǵa úndeıdi. Búgin musylmansha hám zańdy nekemizdi kıeli sahnada Shańyraq kúninde qıyp jatyrmyz. Biz – teatrda tabysqan 16-juppyz. Bul biz úshin eki ese baqyt. Aldymyzda úılengen aǵa-ápkelerimiz qazir úbirli-shúbirli, berekesi men birligi jarasqan jarasymdy otbasyna aınalyp otyr. Aldaǵy ýaqytta da osy ıgi dástúr jalǵasady dep oılaımyz», degen akter súıgenimen qalaı tanysqanyn da aıtyp berdi: «Osy teatrda 2023 jyldan bastap jumys istep kele jatyrmyz. Jarymnyń aty – Aıdana Bolat. Ýnıversıtetke qujat tapsyryp, talapker bolyp kelip turǵanymyzda tanysyp, dos bolyp kettik. Kúlásh Baıseıitova atyndaǵy Qazaq ulttyq óner ýnıversıtetinde Ashat Maemırov sheberhanasynda birge oqydyq. Eki jyl dos bolyp aralasqannan keıin sezimimdi bildirdim. Qyz ben jigit bolyp sóz baılastyq. Endi, mine, shańyraq kótergeli otyrmyz», dep aǵynan jaryldy akter.
Teatr ishindegi aıryqsha oqıǵa – qos akterdiń neke qııý rásimine jınalǵan qonaqtar jastarǵa júrekjardy lebizin bildirip, bir-birine degen ińkár sezimderiniń máńgilik bolýyn, el men jurttyń tek alǵysyna bólenip, ómir men óner jolynda baqtarynyń baıandy bolýyn tiledi.
