Halyqtyń jadynda áıgili Qyz Jibek rólimen máńgi qalǵan Merýert Qarataıqyzynyń marapaty Batys Qazaqstan oblystyq máslıhatynyń kezekten tys ótken 17-sessııasynda tapsyryldy. Marapattaý rásimine óńir basshysy Narıman Tóreǵalıev qatysty.
Merýert О́tekeshova 1951 jyly 25 aqpanda Jánibek aýdanynda dúnıege kelgen. 1968 jyly Almaty qalasynda mektep bitirip, sol jyly «Qyz Jibek» fılminiń basty rólin oınaýǵa shaqyrylǵan. 1973 jyldan kúni búginge deıin Muhtar Áýezov atyndaǵy Qazaq memlekettik akademııalyq drama teatrynda qyzmet etip keledi.
Oblystyq máslıhat depýtattarynyń aldynda sóz alǵan Merýert Qarataıqyzy qurmetti ataqqa usynǵan jerlesterine alǵys aıtyp, ómirden ótken jary Quman Tastanbekovti eske aldy.
– Keshe ǵana, naýryzdyń 10-y kúni, Qumannyń týǵanyna 80 jyl toldy. Baıaǵyda Quman ekeýmiz Batys Qazaqstan oblysynyń talaı aýylyn aralap, talantty balalardy izdep edik, halyqtyń kóńilin talaı kóterip edik. Quman da Batys Qazaqstandy jaqsy kóretin. Jol qıyndyǵyna qaramaı el aralap, kezdesý jasaıtyn edik. Bizge ásirese aýyldan uzaı almaıtyn úlken kisiler qatty rıza bolatyn. Men búgin qatty tolqyp turmyn. Qaı jerde júrsem de Batys Qazaqstandaı halqym, týǵan jerim bar ekenine qýanamyn. Halyq úshin sharshamaı áli qyzmet etip júrmin. Halqymnyń bir kádesine áli jarap júrgenim – men úshin baqyt, – dedi áıgili kınosheberi kózine jas alyp turyp.
Dál osy kúni memlekettik qyzmet salasynda eseli eńbegimen tanylǵan Mırbolat Jaqypov pen Tabylǵalı Saparovqa da «Batys Qazaqstan oblysynyń qurmetti azamaty» ataǵy berildi.
Batys Qazaqstan oblysy
