Úkimet basshysy óńdeý sektorynyń ósimi 6%-ǵa jýyqtaǵanyn, bul sońǵy on jyldaǵy eń joǵary kórsetkish ekenin atap ótti.
«Alty jyl ishinde mashına jasaý salasyndaǵy óndiris úsh ese ósti, al ónerkásiptik óndiristiń jyldyq ortasha ósimi 20,3%-dy qurady. Naqty sandarǵa kelsek, 2018 jylǵy 30 myń jeńil avtokólikpen salystyrǵanda qazir 134 myń birlik óndirilýde. Sol sııaqty júk kólikteriniń óndirisi alty eseden astam ósip, 7,1 myń birlikke jetti, avtobýstardiki jeti esege ulǵaıyp, 2,9 myń birlikke jetti, al arnaıy tehnıka óndirisi úsh esege jýyq artyp, 711 birlikke jetti», delingen maqalada.
Sondaı-aq, Prezıdenttiń tapsyrmasy boıynsha munaı-gaz hımııasyn belsendi damytý bastaldy. El birtindep shıkizat eksportynan tereń óńdeýge kóship, polımerler, kompozıttik materıaldar, hımııalyq reagentter shyǵara bastady. Bul – túrli salalarda suranysqa ıe joǵary qosylǵan quny bar ónimder.
Iri jobalardyń biri – Atyraý oblysyndaǵy KPI zaýyty. Ol qazirdiń ózinde iske qosylyp, polıpropılen óndirip jatyr. Bul zaýyt Ortalyq Azııadaǵy barlyq uqsas kásiporyndardan qýattylyǵy jaǵynan asyp túsedi.