Sýretterdi túsirgen – Erlan OMAR, «EQ»
Elordada «Qara shańyraq» qoǵamdyq birlestiginiń uıymdastyrýymen jáne Astana qalasy ákimdiginiń Tilderdi damytý jáne arhıv isi basqarmasynyń qoldaýymen elordalyq jas otbasylar arasynda dástúrli «Qazaǵymnyń dástúrleri-aı» ulttyq-etnografııalyq saıysy ótti.
Tárbıelik máni mol is-sharanyń maqsaty – qazaq halqynyń salt-dástúrleri men ádet-ǵuryptaryn zaman talabyna saı jańǵyrtý, jastar arasynda nasıhattaý, otbasylyq qundylyqtardy dáripteý jáne jas otbasylardyń qoǵamdyq belsendiligin arttyrý.
Is-sharada Astana qalasynyń Tilderdi damytý jáne arhıv isi basqarmasynyń basshysy Sáken Esirkep saıystyń mańyzyn atap ótti.
– Bıyl Memleket basshysynyń qoldaýymen naýryznama onkúndigi qarsańynda túrli sharalar júzege asyrylyp otyr. Buryn naýryzdy eki-úsh kún toılaıtyn bolsaq, búginde on kún toılap júrmiz. Qazaqtyń dúnıetanymyn ashatyn maǵynaly merekeler oryn alyp, elimizdiń dástúr-aıshyǵyn, ulttyq kıimin, qorshaǵan ortaǵa janashyrlyǵyn kórsetip, ıgi bastamalar qolǵa alynyp otyr. Astana kóleminde 200-ge jýyq is-shara atalyp ótilip jatyr. Búgingi «Qazaqtyń dástúrleri-aıy» – jan-jaqty nasıhattalyp, buǵan deıin tanylǵan is-shara. Saıysqa kóptegen ótinim qabyldanyp, arasynan 8 otbasy iriktelip alyndy. Barsha qatysýshyǵa sáttilik tileımiz, qazaqtyń dástúri jańǵyra bersin, – dedi Sáken Zııabekuly.
Baıqaý qorytyndysy boıynsha bas júlde – Sádýaqas áýletine buıyrsa, I oryn – Ulyqpanuly otbasy, II oryn – Ahet áýleti, III oryndy – Zııahanuly otbasy ıelendi. «О́nerli otbasy» atalymyn Nuǵman áýleti, «Dástúrge berik otbasy» bolyp – Sultan áýleti tanyldy, «О́negeli otbasyn» – Shaıahmet áýleti, «Kórermen kózaıymyn» Gabdýsh áýleti qanjyǵalady.
