Kókeıdegi suraqqa jaýap

Qazir mádenıet­ten jurdaı, qarap otyryp qysylatyn, otbasyńmen kórýge múldem kelmeıtin fılmder barshy­lyq. Kıno ultty uıy­typ, bola­shaq urpaqty tárbıe­le­ý­ge tıis.

Sondyqtan Memleket bas­shysynyń Quryltaıda bul máseleni kótergeni óte oryndy boldy. Sapaly, saýatty, talǵamy bıik kartınalar sany artqan kezde ǵana otandyq kınonyń eńsesi bıik bolady.

Ulttyq kınony qoldaý mem­le­kettik ortalyǵynyń ja­nyndaǵy Saraptama keńesiniń negizi baǵyt­ynyń biri – ár jobanyń ssenarııinen bastap, óndiriske deıingi kezeńdi súzgiden ótkizý. Kıno, ádebıet, óner men anımasııa salasynyń kásibı mamandarynan quralǵan toptyń qara qyldy qaq jaratyn ádiletti bolýy da basty talaptarymyzdyń biri. Ol úshin Saraptama keńesiniń quramy jańartylyp, tipti daýys berý mehanızmin de ózgerttik. Keńes múshesiniń baıqaýǵa qatysyp otyrǵan kınokompanııa ókilderine jaqyndyǵy bar ma, joq pa, jalpy óndiriske qatysy bar ma, osynyń barlyǵy eskeriledi. Buryn-sońdy mun­daı jańashyldyq bolmaǵan. Sonymen qatar ótken jyldan bastap jańa ereje qoldanysqa enip, bul baıqaýdy ashyq ótkizýge qosymsha serpin berdi.

Eń bastysy, san emes – sapa. Sol úshin kıno ortalyqtyń Saraptama keńesi tildiń taza­ly­ǵyna da erekshe mán beredi. Ekranda bylapyt sózder men kózge qorash kórinip, kóńilge qaıaý túsiretin dúnıelerdiń bolmaýyn da qatań qadaǵalaıdy.   

Biz memlekettik qarjy­lan­dy­rýǵa úmitker fılmderdi qoldaýdy jalǵastyra beremiz. Kásibı mamandardyń ǵana emes, jańa esimderdiń paıda bolyp, qazaq kınosynyń kókjıegi keńip, qanaty qataıa tússe degen múddeni de eshqashan esten shyǵarmaımyz.

Kıno – óner ári ıdeologııa. Al ıdeologııanyń bas­ty kúshi – sanaǵa tóńkeris jasaý, ıgi isterdi nasıhattaý. Adam­dyq, ar isine adaldyqty óz bıi­gi­ne kóterý. Bul rette Kıno orta­lyǵy Quryltaıda aıtylǵan dúnıe­lerdi nazarǵa ala otyryp, osy maqsatta  eńbektenýdi jal­ǵas­ty­rady.

Qurmanbek JUMAǴALI,

Ulttyq kınony qoldaý ortalyǵynyń basqarma tóraǵasy