Sport • 20 Naýryz, 2025

Jarys kúndeligi

60 ret

kórsetildi

2 mın

oqý úshin

Almatynyń «Aısulýy» Eýropanyń áıelder hokkeı lıgasynyń (EWHL) fınalyna joldama aldy. Endi olar 21-23 naýryz kúnderi Aýstrııanyń Sankt-Pelten qalasynyń «Sabres» klýbymen sheberlik baıqasady. Qazirgi kezde «Aısulýdyń» sapynda Aıda Oljabaeva, Anna Pıatkova, Mádına Tursynova, Malıka Aldabergenova, Pernesh Áshimova, Alına Ivanchenko, Tatıana Koroleva, Larısa Svırıdova syndy elimizdiń qurama komandasynyń músheleri óner kórsetip júr.

Egemen Qazaqstan

AQSh-tyń Maıamı qalasynda shymyldyǵy túrilgen halyqaralyq týrnırde elimizdiń úsh tennısshisi óner kórsetedi. Alǵashqy aınalymda Aleksandr Býblık argentınalyq Sebastıan Baespen kúsh synassa, Elena Rybakına men Iýlııa Pýtınseva jarysty ekinshi kezeńnen bastaıdy. Elena Renata Sarasýa (Meksıka) men Eshlın Krıýger (AQSh), Iýlııa amerıkalyq Teılor Taýnsend pen Enn Lı arasyndaǵy tartystyń jeńimpazymen kezdesedi. Mıhaıl Kýkýshkın men Aleksandr Shevchenko irikteý saıystarynda súrindi.

Osy aptada «Astana» veloklýbyn úsh birdeı dúbirli doda kútip tur. Fransııa men Belgııadaǵy básekede Keıs Bol, Aaron Geıt, Maks Kanter, Mıkele Gadzolı, Alessandro Romele baq synaıdy. Italııada ótetin «Mılan-Týrın» saıysynda Alberto Bettıol, Davıde Ballerını, Nıkola Konchı, Lorenso Fortýnato, Harold Martın Lopes, Harold Tehada, Dıego Ýlıssı saıysqa túsedi.

Qazaq badmıntonshysy Kamıla Smaǵulova men ulybrıtanııalyq Rohan Hıll Kýba astanasy – Gavanada uıymdastyrylǵan «Torneo Internacional Giraldilla» týrnıriniń juptyq saıysynda kúmis medal ıelendi. Aqtyq synǵa alqynbaı jetken olar fınalda gvatemalalyq Dıana Soto men Krıstofer Salvadorǵa jol berdi.

UFC tarıhynda eń kóp tabys tapqan aralas jekpe-jek sheberleriniń tizimi jarııalandy. Baı-qýattylar kóshin Konor Makgregor bastap tur. Irlandııanyń maqtanyshy óz karerasynda 39,3 mıllıon AQSh dollaryn ıelendi. Ekinshi oryndaǵy Daǵystannyń myqtysy Habıb Nurmagomedov 22,9 mıllıondy enshiledi. Úzdik úshtikti Djon Djons túıindedi. Amerıkalyq arlannyń tabysy – 17,2 mıllıon. Sondaı-aq TOP-10-dyqtyń qatarynda Alıstar Overım (14,4 mln dollar), Stıpe Mıochıch (13,6 mln dollar), Anderson Sılva (13,5 mln dollar), Brok Lesnar (13,2 mln dollar), Aleks Pereıra (12,5 mln dollar), Israel Adesanıa (11,5 mln dollar), Andreı Orlovskıı (11,2 mln dollar) syndy kókjaldar bar.