Sýretti túsirgen – Jangeldi ÁBDIǴALYM
Tigin sehynyń ıesi Gúlsim Hamıtqyzy kúıeýiniń kólik turaǵyn seh retinde paıdalanyp otyr. Uzaq jyl saýda-sattyqpen aınalysyp kelgen sheber eń áýeli balalar keýdeshesin tigip, satypty. Keıin onysy shapan, taqııa, kórpe-jastyqqa ulasqan. Sapaly dúnıe tutynýshy kóńilinen shyǵyp, kún ótken saıyn tapsyrys molaıa túsedi. Kásibine úıiniń bir buryshy tarlyq etip, garajǵa kóshedi. О́zi úlgermeıtin bolǵan soń qasyna tiginshiler alady.
– Kishkentaı kezimizden ájelerimizdiń is tigip otyrǵanyna kózimiz qanyp ósken. Anam da ismer. Kózkórgen jurt bul qabiletimdi ákemniń týǵan apasyna tartqan deıdi. Ol kisi 1930 jyldary aýyldaǵy kelinshekterge kóılek tigip bergen kórinedi. Atam da aǵash ustasy bolǵan. Sol kisiniń qolynan shyqqan besik áli bar. Balalarym, nemerelerim sonymen ósti. Tegimde bar dúnıe tegin jatpasa kerek. Oqýshy kezimde ustazdaryma sháli toqyp beretinmin. Mine, ózimniń súıikti isimdi qolǵa alǵaly on jyldan asty. Qazir tapsyrystyń kóptiginen basqalarynan bas tartýǵa týra keletin kezder de bar, – deıdi áńgimesin áriden bastaǵan Gúlsim Kenjebekova.
Seh ismerleri etnoshapannyń túr-túrin tigedi. Tapsyrys berýshiniń talǵamyna sáıkes oıý-órnegin, tipti esimine deıin kestelep jazyp beredi. «Alshynaı» ónimderiniń brendke aınalǵanyn shetelden túsetin tapsyrystan ańǵarýǵa bolady. Osy kúnge deıin on myńǵa jýyq shapan satylypty. «Instagram» arqyly AQSh, Fransııa, Sıngapýr, Taılandtan da tapsyrys túsken. Keıin Túrkııa, Mońǵolııa memleketindegi elshilikter de syıly meımandaryna arnap birneshe shapan alǵan. «Qazaqmys» kompanııasy da – tigin sehynyń turaqty tutynýshysy.
Seh ujymynyń eń aýqymdy alǵashqy tapsyrysy – Astanada ótken «EXPO» kórmesiniń sahnalary. Dala sahnasynyń shatyryn tigip, ásemdep bezendiripti. Odan keıin «Astana Opera» teatrynyń «Birjan sal» spektakline arnap kıiz úı jabdyǵy men 8 metrlik shatyr tikken. Sodan beri bas qaladaǵy óner ujymdarymen udaıy baılanysta. Qaraǵandydaǵy «Altaı polımetaly» kásipornyna 15 kıiz úı jabdyqtaǵan. Osy sekildi kásiporyndar men memlekettik mekemelerge otyzǵa tarta kıiz úı qurap bergen. Qazaqstan musylmandary dinı basqarmasy bas keńsesiniń májilis zalyndaǵy barlyq oryndyqty qaptap, sahna shymyldyǵyn ásemdegen. «Helios», «Gazpromneft» sekildi kompanııadaǵy jumysshylardyń kıimin de osyndaǵy ismerler piship, tigedi.
Tórt tiginshi jumysqa memlekettik baǵdarlamalar («Altyn jas», «Kúmis jas» jobasy men «Jastar praktıkasy» baǵdarlamasy) arqyly qabyldanǵan.
– Mamandyǵym – tiginshi. Mansap ortalyǵynda jumys izdep júgingenimde «Kúmis jas» jobasy boıynsha osy sehty usyndy. Ujym birden unady. Is tigý – óte názik jumys. Asa muqııat bolý kerek. Bir-birimizge bilgenimizdi úıretemiz. Yntymaq jarasqan jerde yrys molaıady. Bos kúnimiz bolmaıdy. Tapsyrys kóbeıgen saıyn tabys ta artady, – deıdi Aınagúl Asanbaeva.
Baqytkamal Isabekova is-mashınasymen keskindeme jasaıdy. Eń jaýapty jumys – osy mamandiki. «Seh ekinshi úıime aınaldy. Mundaǵy mindetim – etnoshapanǵa, basqa da kıimge kompıýter kómegimen keskindeme salý» deıdi ismer.
Gúlsim Hamıtqyzy byltyr «Damý» qorynyń 20 mln teńge jeńildetilgen nesıesi arqyly sehqa qajetti is mashınkalaryn alypty.
– Áli de sehty keńeıtsem deımin. Endi lazerli keskindemeli apparat alǵymyz keledi. Jún óńdeý sehyn da qatar alyp júrý oıymda bar. Ol úshin bıyl grantqa qatyssam deımin. Yńǵaıy kelse bárin bir jerde atqarýdy oılap otyrmyz, – deıdi.
Qaraǵandy oblysy
