Teledıdar arqyly ákesin tapty

Petropavl qalasynyń tur­ǵyny Kemel Asqarov maıdan dalasynda qaza tapqan ákesiniń jerlengen jerin kóp jyldan beri izdestirýmen keldi. Qaıda jazsa da «iz-túzsiz joǵaldy, habar-osharsyz ketti» degen jaýap alyp júrdi. Janyna medet tutqan bar deregi – ákesi Asqar Isaqovtyń 1943 jyly mamyrdyń 7-si kúni Kalının oblysyndaǵy Novosokolnıcheskıı aýda­nyn­­daǵy Býtınıno selosy ma­ńyn­da qaza tapqany. Otbasyna joldanǵan «qara qaǵazda» osylaı jazylǵanymen, dańqty 28 panfılovshylardyń polıtrýgy Klochkov aıtqandaı, «Reseı keń baıtaq», qaı jerinen izdep tabarsyń? Sońǵy kezderi Reseı Federasııasynyń muraǵattaryna jibergen ótinishteri de aıaqsyz qalyp, júregin aýyr muń basty. Birde teledıdardan Uly Otan soǵysy jaıly fılmdi tamashalap otyryp, boıyndaǵy úmit oty qaıta janǵandaı boldy. Kalının oblysynyń Pskov oblysy, al Býtınıno selosynyń Zolotkovo bolyp ózgergenin bilisimen dereý qolyna qalam men qaǵaz aldy. Zolotkovo selosynyń bılik ókilderine úshbý hat joldap, baýyrlastar zıratynyń fo­tosýretin jiberýdi ótindi. Kóp uzamaı jiberilgen jaýaptan 302-shi dıvızııanyń 17-shi at­qyshtar polkinde áskerı boryshyn ótegen ákesiniń baýyrlas­tar zıratynda jerlengenin, esimi estelikter kitabyna engizilgenin bilip, tóbesi kókke jetkendeı qýandy. Bul – 2010 jyl bolatyn. Osy jyly sol kezdegi Reseı Federasııasynyń premer-mı­nıs­tri Vladımır Pýtınge hat jazyp, Zolotkovo selosyndaǵy 2600 sarbaz jatqan jaýyngerler zıratyna memorıaldyq taqta or­natý jóninde ótinish bildirdi. Aqsaqaldyń tilegi qabyl alynyp, 2012 jyly memorıaldyq taqta qoıyldy. Betine Uly Otan soǵysy kezinde qaza tapqan jaý­yngerlerdiń esimderi jazyldy. Olardyń bel ortasynan qazaq jaý­yngeri Asqar Isaqovtyń aty-jóni oıyp turyp oryn aldy. Kemekeń bıyl áke aldyndaǵy perzenttik paryzyn oryndap, uly Erlanmen birge baýyrlastar zıratyna baryp qaıtty. Reseı jerindegi Je­ńistiń 70 jyldyǵyna arnalǵan saltanatty sharalarǵa qa­tys­qan qarııanyń aıtýynsha, me­morıaldyq taqtany kórý úshin Almaty, Aqtóbe, Aty­raý, Baıqońyr, Qyzylorda, Shym­kent qalalarynan jáne Reseıdiń ózge aımaqtarynan kelgender az bolmapty. Qarııa endi týǵan aýylyna baryp, ákesi jerlengen jerden ala kelgen bir ýys topyraqty anasynyń zıratyna jetkizip, qulpytas ornatýdy josparlap otyr. Dýlat QOJAHMETOV, jýrnalıst. Soltústik Qazaqstan oblysy.