Jańa joba Bolat О́temuratov qorynyń bastamasymen júzege asyrylyp, qala ınfraqurylymynyń damýyna qosylǵan eleýli úles boldy. Jalpy aýmaǵy 8,5 myń sharshy metrdi quraıtyn ortalyq bir mezgilde myńǵa jýyq adamdy qabyldaı alady. Quny 20 mıllıon dollar bolatyn ǵımarat qala menshigine tegin berildi.
«Qala mártebesi berilgenine nebári tórt jyl ótse de, Qosshyda áleýmettik nysandardy salý men jańǵyrtý qarqyndy júrip jatyr. Búgin biz elimizde alǵash ret halyqaralyq standarttarǵa saı kópfýnksıonaldy keshenniń ashylýyna kýá boldyq. Bul joba Memleket basshysy Qasym-Jomart Kemeluly Toqaevtyń tapsyrmasy aıasynda Bolat О́temuratov Qorynyń qoldaýymen júzege asyryldy. Munda balalar men eresekter úshin barlyq zamanaýı jaǵdaı jasalǵan», dedi oblys ákimi Marat Ahmetjanov ǵımarattyń ashylý saltanaty kezinde.
Ortalyq sporttyq, bilim berý jáne mádenı-demalys aımaqtaryn biriktiredi. Munda 233 oryndyq kınoteatr, 300 adamǵa arnalǵan leksııa, kórme jáne konferensııa zaldary, stýdııalar, kovorkıng pen oqý zaly bar kitaphana ornalasqan. Aýmaǵynda sport alańdary, vorkaýt aımaqtary men serýenge arnalǵan alleıa bar. Robototehnıka, shahmat, horeografııa jáne qoldanbaly óner úıirmeleri jumys isteıtin bolady. Eresekterge arnalǵan yńǵaıly jumys, demalys jáne qarym-qatynas keńistigi qarastyrylǵan. Seksııalar men úıirmelerdiń aqysy qoljetimdi bolady.
«Biz jyldar boıy memleketke qoldaý kórsetip, ár otandasymyz úshin qoljetimdi, zamanaýı ári jaıly ınfraqurylym qalyptastyrýǵa úles qosyp kelemiz. Bul jobada álemdik tájirıbeniń ozyq úlgilerin negizge aldyq. Basty maqsatymyz – ortalyqqa kelgen ár adamnyń óz áleýetin iske asyryp, Qosshydaǵy ómir sapasyn arttyrýyna múmkindik jasaý», dedi Qamqorshylyq keńesiniń tóraǵasy Almaz Sharman.
Ortalyqtyń ashylýyna Premer-Mınıstrdiń orynbasary Ermek Kósherbaev, QR Mádenıet jáne aqparat vıse-mınıstri Evgenıı Kochetov qatysty.
Komıýnıtı-ortalyq – bul bilim alý, shyǵarmashylyq jáne belsendi demalys úshin ashyq ári qoljetimdi keńistik usynatyn zamanaýı halyqaralyq format. Mundaı ortalyqtar jergilikti qaýymdastyqtyń damýyna jáne áleýmettik baılanystardyń nyǵaıýyna yqpal etedi.
Bul Bolat О́temuratov qorynyń Qosshy qalasyna tartý etken ekinshi áleýmettik nysany. Buǵan deıin 2023 jyldyń qyrkúıeginde qor qalaǵa 1500 oryndyq zamanaýı mektepti syıǵa tartqan bolatyn. Sonymen qatar Qosshyda demeýshilik qarajat esebinen zamanaýı kópsalaly aýrýhana qurylysy júrgizilip jatyr.
Aqmola oblysy
