Sýret: Astana Hub
Atalǵan baǵdarlamaǵa ázirleýshiler, ınjenerler, analıtıkter, bıznes-developerler, PR menedjerler men marketologter, dızaınerler, sondaı-aq «product», «project» jáne «sales» menedjerler qatysa alady. Akselerator qatysýshylarǵa jasandy ıntellekt salasyndaǵy daǵdylaryn damytyp qana qoımaı, óz ıdeıalaryn naqty jobaǵa aınaldyrýǵa múmkindik beredi. Baǵdarlama offlaın formatta – Astanada ótedi. Basqa qalalar men elderden kelgen qatysýshylarǵa turǵyn úı beriledi. Oqytý merzimi úsh aıdy qamtyp, salalyq sarapshylardyń jeke keńesteri men jobalar boıynsha belsendi praktıkalyq jumys júrgiziledi. Akselerasııa baǵdarlamasy úsh negizgi kezeńnen turady. Alǵashqy úsh aptada qatysýshylar bir-birimen tanysyp, kásibı daǵdylaryn kórsetip, komandalar qurady. Ekinshi kezeńde komandalar óz ıdeıalaryn synaqtan ótkizip, Investısııalyq komıtetke usynady. Osy kezeńde baǵdarlamanyń fınalyna ótetin jobalar anyqtalady. Al keıingi kezeńde komandalar startap-joba ázirleýge kirisedi.
«AI'preneurs baǵdarlamasy birinshi leginiń nátıjeleri qatysýshylardyń joǵary qyzyǵýshylyǵyn oıatty. 250 ótinimniń ishinen 50 maman iriktelip, 21 komanda quryldy. Onyń 9-y akselerasııany sátti aıaqtap, úzdik komandalar «Seed Money» baǵdarlamasy aıasynda qarjylandyrýǵa ıe boldy. Qatysýshylar jobalaryn iske qosqannan keıingi alǵashqy aıda jalpy satylym kólemi 17 myń dollardy qurady. Ázirlengen startaptar densaýlyq saqtaý, bilim jáne bıznes salalaryn qamtydy», dedi «Astana Hub» basqarýshy dırektory Tańat О́skembaev.
Aıta keteıik, «Astana Hub» qatysýshylardy barlyq kerek-jaraqpen qamtamasyz etedi. Al úzdik komandalar standartty «SAFE» kelisimi aıasynda bastapqy ınvestısııa alady. Baǵdarlamaǵa ótinimder qaldyrý ýaqyty 1 sáýirge deıin jalǵasady.
