Kókshetaý men Qorǵaljynǵa deıingi keń kósilgen saıyn dalada orman barshylyq. Oblystyq Tabıǵat resýrstary jáne tabıǵatty retteý basqarmasyna qarasty 13 orman sharýashylyǵy jumys isteıdi. Sharýashylyqtar el ıgiligin kózdiń qarashyǵyndaı kúzetip, jyl saıyn kóshet egip, orman alqabyn keńeıtip keledi. Búginde óńirdegi orman qorynyń aýmaǵy 1,06 mıllıon gektardy quraıdy. Onyń úshten biri, ıaǵnı 445,3 myń gektary – ormandy alqap. Memlekettik orman qory basqarmaǵa tıesili. Ol degenińiz 405,1 myń gektar.
Joǵaryda memlekettik orman sharýashylyqtary orman úlesin molaıtý baǵytynda eseli jumys istep kele jatqandyǵyn ekpin túsirip aıtyp óttik. Sál taldaý jasalyq, 2009 jyly 17,6 myń gektar alqapqa kóshet otyrǵyzyldy. Astana – Shýchınsk baǵytyndaǵy avtojoldyń qos qaptaly ormanshylardyń ońdy jumysynyń arqasynda kórkeıip keledi. Jasyl beldeý jyl ótken saıyn jaıqalyp ósip, kózqýanyshqa aınalyp otyr. О́kpek jolaýshy Býrabaı taýlarynyń baýraıynan bastaý alyp, Shortandyǵa deıin sozylatyn jol boıynda tamyljyǵan tabıǵattyń qunarly bir pushpaǵyna kóz sýsyndatyp, kókiregin qýanyshqa toltyrady. Jol boıyndaǵy jasyl beldeý jyl ótken saıyn eseleı kóbeıip, san alýan aǵash boı kóterip, syrbaz sulýlyǵy álemge ańyz bolyp taraǵan jumaq ólkeniń jupar ıisin samal jelmen taratyp, peıish pishindi ǵajaıyp kóriniske ıe bolyp barady.
El baılyǵyn eseleý týraly Memleket basshysy Qasym-Jomart Toqaevtyń tapsyrmasyna sáıkes, bul taraptaǵy jumys meılinshe muqııat atqarylyp jatyr. Prezıdent tapsyrmasynda keıingi bes jyl ishinde orman qoryn eseleý maqsatynda 2 mıllıardqa jýyq kóshet otyrǵyzý mindeti júktelgen bolatyn. Osy tapsyrmany oryndaý barysynda óńir 2021–2027 jyldary 150 mıllıon dana qylqan japyraqty jáne japyraqty aǵash kóshetterin 23,8 myń gektarǵa otyrǵyzýdy mejelegen edi. 2021 jyly orman sharýashylyqtary 1 370 gektarǵa kóshet otyrǵyzdy. Áýel basta 970 gektar josparlanǵan. Tamasha tabıǵattyń sulý ajaryn sylandyratyn sharapatty sharýaǵa belsene úles qosqan ormanshylar bul taraptaǵy jospardy 141%-ǵa oryndap shyqty. 2022 jyly orman sharýashylyqtary josparda kórsetilgen 1 280 gektardyń ornyna 2 845,5 gektar jerge kóshet otyrǵyzdy. 17,2 mıllıon dana kóshet aıaly qoldardyń sharapatymen kóktep boı kóterdi. Jospar 222,3%-ǵa oryndaldy. Odan keıingi jyldary da qyrýar jumys atqaryldy. Bıyl orman sharýashylyqtary 2 myń gektar jerge 14 mıllıon dana kóshet otyrǵyzýdy mejelep otyr.
Bul iste eń bastysy – kóshet daıyndaý. 11 tálimbaqtyń 171 gektar alqabynda 10 mıllıon dana bir-eki jyldyq kóshet baptalyp, daıyn tur. Bul kólem barlyq qajettilikti óteýge tolyq jetedi. Orman sharýashylyqtary japyraqty aǵash túrleriniń tuqymyn der kezinde jınap keptirip qoıǵan bolatyn. Erte qamdanǵannyń esesi ketpeıdi degendeı, 113 tonna tuqym jınaldy. 7 tuqym keptirgishte 70 tonna qaraǵaı búrshikteri óńdeýden ótkizildi.
Jumys aýqymy keńeıgennen keıin jańa tálimbaqtardyń qurylysyn júrgizý qajettiligi týyndap otyr. Jalpy kólemi 62 gektardy quraıtyn turaqty tálimbaqtyń jobalaý-smetalyq qujaty daıyndalyp jatyr. Oıǵa alǵan is ońynan ońǵarylǵan kezde Kókshe dalasyndaǵy kóshetterdiń sany da óse túspek. Ár jyl saıyn óz isine jaýapkershilikpen qaraıtyn orman sharýashylyǵynyń eńbekkerleri eseli úlesin qosyp jatqanymen, óńirdegi ormandy alqaptyń kólemi barlyq jerdiń 3%-yn ǵana quraıdy. Tapsyrma júzege asyrylǵan kezde qoldyń salasyndaı aq qaıyńdar men máńgi jasyl qaraǵaılar kómkergen kórikti óńirdiń omyraýynda balǵyn kóshet kúnge boı salyp kóterilip, ormandy alqaptyń omyraýy yrysqa tunyp turmaq.
Aqmola oblysy
