Grek-rım kúresinen elimizdiń quramasyna 1995, 1996, 2003, 2004, 2006 jyldar asa tabysty boldy. Ulttyq komandanyń tizginin dańqty balýan Dáýlet Turlyhanov ustaǵan tusta Azııa chempıonattarynda tórt altynnan oljalap, tórtkúl dúnıe jankúıerlerin tamsandyrdyq. 1995 jyly Manılada Rýslan Jumabekov (74 kg), Baqtııar Baıseıitov (82 kg), Dáýlet Turlyhanov (90 kg), Sergeı Matvıenko (100 kg) syndy sańlaqtar bas júldeni oljalady. Osy jarysta jerlesterimiz uzaq jyl boıy Azııada ústemdik qurǵan Ońtústik Koreıany tuǵyrdan taıdyryp, jalpykomandalyq esepte kósh bastady. Taıaýda ǵana Táýelsizdik alǵan oǵlandardan ondaıdy kútpegen sol kezdegi koreı quramasynyń bas bapkeri, kezindegi Turlyhanovtyń syralǵy qarsylasy Kım En Namnyń tańdanysyn jasyra almaı, sharasyzdyqtan bas shaıqaǵanyn da kózimiz kórdi.
1996 jyly Sıaoshande dál sol kórsetkishti qaıtaladyq. Qytaı elinde taǵy tórt apaıtósimiz qarsylastarynyń barlyǵyn sypyra utyp, jeńis tuǵyrynyń eń bıik satysyna kóterildi. Ondaı baq Iýrıı Melnıchenko (57 kg), Dáýlet Turlyhanov (82 kg), Sergeı Matvıenko (90 kg), Sergeı Fedorenkoǵa (100 kg) buıyrdy.
HHI ǵasyrdyń alǵashqy jyldary da tabysqa toly boldy. Máselen, 2003 jyly Nıý-Delıde Áset Imanbaev (55 kg), Abdolla Jabyraıylov (84 kg), Georgıı Sýrsýmııa (120 kg) bas júldeni qanjyǵasyna baılady. 2004 jyly Almatyda esimderi joǵaryda atalǵan beldi balýandar dál sol nátıjelerin aına-qatesiz qaıtalady. 2006 jylǵy Azııa chempıonaty qaıta Alataý baýraıynda ótti. Bul joly Nurbaqyt Teńizbaev (60 kg), Marǵulan Ásembekov (96 kg), Georgıı Sýrsýmııa (120 kg) teńdessiz dep tanyldy. Sondaı-aq segiz jarysta (1997, 1999, 2005, 2014, 2018, 2021, 2022, 2023 jyldary) eki altyndy, 11 dodada (1993, 2000, 2009, 2011, 2012, 2013, 2015, 2016, 2017, 2020, 2024) bir altyndy ıelendik. Bes baıraqty básekede (2001, 2007, 2008, 2010, 2019) otandastarymyzǵa bas júlde buıyrmady.
Kúres túrlerinde jalpy eseptiń qorytyndysy shyǵarylǵan kezde medaldardyń sany emes, ár komandanyń jıǵan jalpy upaıy esepke alynady. Osy oraıda elimizdiń quramasy ózderi qatysqan 29 Azııa chempıonatynyń jeteýiniń (1995, 2003, 2004, 2006, 2014, 2018, 2022) komandalyq saıysynda jeke-dara kósh bastady. Ońtústik Koreıanyń da (1993, 1996, 1997, 2000, 2005, 2010, 2013) kórsetkishi dál sondaı. Desek te 1983–1992 jyldar aralyǵynda qurlyqtyq doda taǵy bes ret uıymdastyrylǵanyn eskergen jón. Sonyń úsheýinde (1989, 1991, 1992) koreılerdiń qarqynyna eshkim shydamady. Sol kezeńde Iran (1983) men Japonııanyń da (1987) baǵy jandy. Elimiz KSRO-nyń quramynda boldy.
Jańa ǵasyr tabaldyryqtan attaǵan tusta Irannyń «klassıkteri» qarqynyn kúrt kúsheıtti. Parsy eliniń 14 márte (2001, 2007, 2008, 2009, 2011, 2012, 2015, 2016, 2017, 2019, 2020, 2021, 2023, 2024) mereıi ústem boldy. Sóıtip, olar qazaqtardan da, koreılerden de ozdy. Taǵy bir jarysta О́zbekstannyń (1999) asyǵy alshysynan tústi. Jalpy esepte tek osy tórt eldiń órenderi ǵana top jardy.
1993–2024 jyldar aralyǵynda Irannyń – 58, Ońtústik Koreıanyń – 56, Qazaqstannyń – 44, Qyrǵyzstannyń – 23, О́zbekstannyń –19, Japonııanyń – 16, Qytaıdyń – 11, Soltústik Koreıanyń – 3, Úndistan men Sırııanyń – 2 grek-rım kúresi sheberi Azııa chempıony degen ataqqa qol jetkizdi. Sary qurlyqtyń basty dodasynda daralanýǵa nebári 10 memlekettiń marqasqalarynyń ǵana kúsh-jigerleri jetti. Basqalary kúmis pen qolany qanaǵat tutty.
Osy sport túrin serik etken qazaq eliniń 44 óreni Azııa chempıony atanǵanyn joǵaryda aıttyq. Solardyń arasynan Sergeı Matvıenko (1993, 1995, 1996, 1999) men Georgıı Sýrsýmııany (2003, 2004, 2005, 2006) bóle-jara atap ótsek, esh aıyby joq. Olar tórt retten top jardy. Dáýlet Turlyhanov (1995, 1996), Baqtııar Baıseıitov (1995, 2000), Iýrıı Melnıchenko (1996, 1997), Mhıtar Manýkıan (1997, 1999), Áset Imanbaev (2003, 2004), Abdolla Jabyraıylov (2003, 2004), Marǵulan Ásembekov (2005, 2006), Almat Kebisbaev (2011, 2018), Nurmahan Tinálıevtiń (2013, 2015) eki márte mereıi ústem boldy. Sondaı-aq Rýslan Jumabekov (1995), Anatolıı Fedorenko (1996), Nurbaqyt Teńizbaev (2006), Darhan Baıahmetov (2009), Erbol Qońyratov (2012), Nursultan Tursynov (2014), Erulan Ysqaqov (2014), Dosjan Qartyqov (2016), Maqsat Erejepov (2017), Ashat Dilmuhamedov (2018), Temirlan Shadýkaev (2020), Aıdos Sultanǵalı (2021), Sultan Ásetuly (2021), Meıirjan Shermahambet (2022), Álimhan Syzdyqov (2022), Ibragım Magomadov (2023), Dıas Qalen (2023), Erjet Jarylqasyn (2024) syndy jampozdar sary qurlyqta aldyna jan salmady.
Keıingi Azııa chempıonaty byltyr Bishkekte ótti. Bul jarysta Iran quramasyna teń keler komanda tabylmady. Parsy eliniń pehlevandary 4 altyn, 3 kúmis, 2 qolany oljalady. Ekinshi, úshinshi oryndardy Japonııa (3+2+2) men Qyrǵyzstan (1+2+3) ıelendi. Elimiz (1+2+1) tórtinshi satyǵa turaqtady. Balýandarymyz arasynan Erjet Jarylqasyn (63 kg) jeńimpaz atandy. Sheshýshi tusta ol japonııalyq Aıata Sýzýkıge san soqtyrdy. Nursultan Tursynov (87 kg) pen Iýsýf Masıev (97 kg) fınalda súrindi. Ekeýi de Irannyń balýandaryna ese jiberdi. Ibragım Magomadov (77 kg) qola medaldy enshiledi.
Grek-rım kúresinen 2024 jylǵy Azııa chempıondary: 55 kg – Ro Iýchol (Ońtústik Koreıa), 60 kg – Jolman Sharshenbekov (Qyrǵyzstan), 63 kg – Erjet Jarylqasyn (Qazaqstan), 67 kg – Saıd Esmaılı (Iran), 72 kg – Sıngo Harada (Japonııa), 77 kg – Nao Kýsaka (Japonııa), 82 kg – Taızo Ioshıda (Japonııa), 87 kg – Naser Álızade (Iran), 97 kg – Muhammedhadı Saravı (Iran), 130 kg – Ámın Myrzazade (Iran).
