Olar tylsymnan moınyna júktelgen amanat-paryzdy qaltqysyz túsinip, minsiz atqaryp, shákirt tárbıelep, kesheden kelgen, búgin ózi ustaǵan ónerdi shákirtteri arqyly keleshekke jalǵaıdy. О́nerdiń aýyr júgin arqalaǵan múıizi qaraǵaıdaı azamattar arasynda búrme kóılegi men oıýly qamzoly kózge uryp, syrǵasy men sholpysy syńǵyrlap, Mańǵystaýdyń altyn shýaǵyna mańdaıyn súıgizip, erke samalyna shashyn sıpatyp, kók teńiz jaǵasynda kúlimdeı óner kórigin qyzdyryp júrgen qyzdardyń biri – dombyrashy, kúıshi, ánshi Rýhııa Batyrshıeva.
Mańǵystaý oblysy Túpqaraǵan aýdany Fort-Shevchenko qalasynda kópbalaly otbasynda dúnıege kelgen Rýhııa orta mektepti bitirgen soń Fort-Shevchenko qalalyq mádenıet jáne bilim bólimderinde qyzmet atqardy. Mádenıet úıi janynan qurylǵan ult-aspaptar orkestriniń beldi múshesi jáne «Aqbóbek» arýlar ansamblinde jetekshilik qyzmette júrip oblystyq komsomol komıtetiniń joldamasymen Bolgarııa eliniń tórt qalasynda gastroldik saparmen halyqaralyq festıvalǵa qatysyp bas júlde alyp qaıtty. Jeńis qanattandyrǵan ári óziniń taǵdyry ónermen qabysa óriletinin túsingen Rýhııa Almatyda qazirgi J.Elebekov atyndaǵy óner koledjinde professor Qubysh Muhıtovtyń klasynda dombyra aspaby boıynsha bilim ala júrip, qosymsha Qazaqstannyń Halyq ártisi Ǵarıfolla Qurmanǵalıevten dástúrli án-terme boıynsha sabaq aldy. О́nerdi súıgen qyz munymen toqtap qalǵan joq, Almaty memlekettik Qurmanǵazy atyndaǵy Ulttyq konservatorııada oqı júrip, Akademııalyq Qurmanǵazy atyndaǵy ult-aspaptar orkestriniń ártisi bolyp qyzmet atqardy. Týǵan jerge kásibı joǵary bilimdi maman bolyp oralǵan ol eńbek jolyn Fort-Shevchenko qalasy Muryn jyraý saz mektebiniń dırektory qyzmetinen bastady. Osy kezden bastap Rýhııa Mahmutqyzy ulttyq ónerdi nasıhattaý, jas ónerpazdardy tárbıeleý isinen aýytqyp kórgen joq. Aqtaý qalasy óner mektebinde bólim meńgerýshisi, Abyl Taraquly atyndaǵy qazaq balalar óner mektebiniń dırektor qyzmetin jasaı júrip, 1992 jyly Mańǵystaý oblystyq fılarmonııasy janynan qurylǵan «Aqjarma» folklorlyq ansambliniń múshesi jáne jeke oryndaýshysy, A.Taraquly atyndaǵy ult asapaptar orkestrinde ártistik qyzmetin atqardy. Keıin atalǵan fılarmonııa dırektory, sosyn A.Taraquly atyndaǵy qazaq balalar óner mektebi dırektory qyzmetin atqardy. Tek ustaz retinde eńbek etip qoımaı, qazaq ónerin damytý jolynda erlermen birge talaı másele kóterdi, talap etti, nátıjege jetti. Ult óneriniń bolashaǵy úshin Aqtaý qalasynan qazaq balalar óner mektebin ashý, ol mektepke Abyl Taraqulynyń esimin berýdiń basy-qasynda talaı tabaldyryqty tozdyryp, talaı esikti qaǵyp barǵandardyń biri osy Rýhııa apamyz.
2018 jyly zeınetke shyqqanmen ulaǵatty ustazdyq jumysynan qol úzgen joq, dáýlesker dombyrashy, tájirıbeli ustazdyń jas óskinge berer rýhanı azyǵy mol ekendigin bilgen basshylar qyzmette qaldyrdy. Qazaqstannyń oqý isiniń úzdigi, Qazaqstannyń eńbek sińirgen qaıratkeri, Aqtaý qalasynyń qurmetti azamaty, «Eren eńbegi úshin» medaliniń ıegeri Rýhııa Mahmutqyzynyń shákirtteri búginde elimizdiń ár túkpirinde óner sapynda júr, kolledj, konservatorııa bitirip, kásibı maman retinde óner ordalarynda jumys istep, oqý oryndarynda shákirtterge bilim berip júrgenderi qanshama? Ustaz muraty, óner sabaqtastyǵy degen osy bolsa kerek. Bul turǵydan kelgende Rýhııa ózine tabıǵattan berilgen amanat-paryzdy oryndady dep bilemiz. Shákirtiniń biri – dástúrli ánshi, dombyrashy, Qazaqstannyń eńbek sińirgen qaıratkeri, «Daryn» Memlekettik jastar syılyǵynyń laýreaty, «Qurmet» ordeniniń ıegeri, Qazaq ulttyq ýnıversıtetiniń professory, mádenıet salasyndaǵy Prezıdent stıpendııasynyń ıegeri Aıgúl Qosanova. Rýhııa Aıgúl shákirtin maqtanyshpen aıtyp júredi.
Jany jaısań, qarapaıym, árdaıym kúlimdep, jan-jaǵyna jylý shashyp júretin ánshi, dombyrashy Rýhııa – otbasynda aıaýly ana, asyl áje. Uly Baqytjan munaı salasynda eńbek etse, kishi uly Almas ózi sııaqty qońyr dombyrany quıqyljytqan dáýlesker dombyrashy, qarshadaıynan kúı dodalarynda top jarǵan júırik, Ulttyq konservatorııa túlegi. Shattyǵy shalqyǵan otbasynda nemerelerin qyzyqtap, qoǵamda ulttyq ónerdi nasıhattap júrgen Rýhııa Mahmutqyzy halyqqa shyǵarmashylyq ári eseptik konsertin berip, kórermenge áserli de ádemi kesh syılaıtyny sózsiz.
Mańǵystaý oblysy
