Foto: Qyrmyzy Jumaǵalıqyzy
Festıval qazaq halqynyń baı mádenı murasyn jańǵyrtý, ulttyq qundylyqtardy dáripteý jáne umyt bola bastaǵan dástúrlerdi qaıta jandandyrýdy maqsat etti. Osy oraıda shara barysynda túrli etnografııalyq kórinister, teatrlandyrylǵan qoıylymdar, ulttyq taǵamdar jármeńkesi, dástúrli oıyndar men qolóner kórmeleri uıymdastyryldy.
Etnofestıval aıasynda qazaqtyń kóne salt-dástúrleri men ádet-ǵuryptary keńinen nasıhattaldy. Sondaı-aq, ulttyq kıimder men áshekeı buıymdar kórmesi uıymdastyrylyp, qazaq halqynyń sándik ónerine qyzyǵýshylyq tanytqandardyń qatary kóp boldy.
Merekelik sharaǵa kelgen qonaqtar qazaqtyń ejelgi ashanasymen de jaqynyraq tanysty. Arnaıy uıymdastyrylǵan ulttyq taǵamdar jármeńkesinde qonaqtar qymyz, shubat, baýyrsaq, naýryz kóje sekildi dámderden aýyz tıdi. Ulttyq taǵam ázirleý sheberleri et asý, qazanjappaı, talqan daıyndaý sııaqty dástúrli ádisterdi kórsetti.
Budan bólek, etnoaýyl aýmaǵynda qazaqsha kúres, arqan tartys, asyq atý, teńge ilý sekildi dástúrli oıyndar uıymdastyrylyp, jınalǵan kópshilik belsendi túrde qatysty. Ásirese, balalarǵa arnalǵan oıyn alańdary erekshe kóńil-kúı syılady.
Festıval barysynda arnaıy etno-fotozonalar daıyndalyp, kelgen qonaqtar ulttyq naqyshtaǵy bezendirilgen kıiz úıler men qazaqy buıymdar aıasynda estelik sýretke tústi. Kıiz úı sheberleri, zergerler men ulttyq qolóner sheberleri ózderiniń biregeı týyndylaryn kópshilik nazaryna usynyp, ulttyq ónerdiń san alýan qyryn pash etti.
Festıvalge Qazaqstannyń túkpir-túkpirinen kelgen ónerpazdarmen qatar, túrkitildes elderden de qonaqtar qatysty. Olar ózderiniń ulttyq ónerin ortaǵa salyp, halyq ánderi men bılerin oryndady. Bul shara tek qazaq mádenıetin ǵana emes, jalpy túrki halyqtarynyń ortaq murasyn nasıhattaýǵa baǵyttalǵan.
Is-sharaǵa jınalǵan jurtshylyq ulttyq qundylyqtarǵa jaqyn bolýdyń mańyzdylyǵyn sezinip, erekshe ásermen tarqasty.
