Joǵary áleýet atalǵan júzdesý

Qazaqstan Respýblıkasynyń Katardaǵy elshisi Asqar Shoqybaevtyń osy eldiń burynǵy basshysy, Ámirdiń ákesi sheıh Hamad ben Halıfa Ál-Tanımen kezdesýi bolyp ótti. Kezdesý barysynda Ámirdiń ákesi Qazaqstan elshisin onyń Katar Memleketindegi dıplo­ma­tııalyq mıssııasynyń bastalýymen quttyqtap, Qazaqstan-Katar qarym-qatynastarynyń joǵary áleýetin atap ótti. Sheıh Hamad óz eliniń Qazaqstan Respýblıkasymen jan-jaqty baı­lanystarynyń damýy men kúsheıýine úlken mán beretindigin atap ótti. Ol óziniń Qazaqstan Prezıdenti N.Á.Nazarbaevpen ótkiz­gen kezdesýlerin jyly sezim­men eske ala otyryp, Elbasynyń memleketimizdiń qalyptasýy men damýyna qosqan orasan zor úlesin asa joǵary baǵalaı kele, Elbasyna sálemi men jyly lebizderin jetkizýdi suraı otyryp, Dohaǵa saparmen kelýin kútip otyrǵandyǵyna nazar aýdardy. A.Shoqybaev Qazaqstan táýel­sizdikke ıe bolǵaly beri saıası, eko­nomıkalyq jáne áleýmettik salalarda qol jetkizgen jetistikteri týraly aıtyp berdi. Sonymen qatar, suhbat barysynda ekijaq­ty yntymaqtastyqtyń kún tárti­bindegi, saýda-ekonomıkalyq jáne ınvestısııalyq baılanystardy kúsheıtý, Katardyń Qazaqstandaǵy ınvestısııalyq jobalarǵa qaty­sýy, Qazaqstan-Katar úkimetaralyq komıssııasynyń otyrysyn ótkizý, Qazaqstannyń 2017-2018 jyldary BUU Qaý­ip­sizdik Keńesiniń turaqty emes músheligine saılanýǵa, Azyq-tú­lik qaýipsizdigi boıynsha Islam uıymynyń keńsesin Astanada qurý týraly bastamalaryna Katardyń qoldaý bildirýi, sondaı-aq, Astana qalasynda Sheıh Támım ben Hamad Ál-Tánıdiń atyndaǵy mektep pen Semeı qalasynda respýblıkalyq saýyqtyrý ortalyǵyn salý sııaqty kókeıkesti máseleler talqylandy. Jalpy alǵanda, Ámirdiń ákesi Qazaqstan men Katar arasyndaǵy ekijaqty yntymaqtastyqty nyǵaıtý boıynsha barlyq bas­tamalardy qoldaıtyndyǵyn jáne onyń iske asyrylýyn óziniń jeke baqylaýyna alatyndyǵyn jetkizdi. «Egemen-aqparat».