Aıta keteıik, buǵan deıin atalǵan elderden ınvestısııa tartý maqsatynda kásipkerler arasynda kezdesýler ótken. Aradaǵy ekonomıkalyq baılanystardy osy mádenı is-shara bekite tústi.
Keıingi jyldary Qyzylorda oblysynyń óner kúnderi Astana men Almatyda zor tabyspen ótti. Sondaı-aq, Syr óńiriniń shyǵarmashylyq ujymdary Eýropa elderine gastroldik saparmen birneshe ret bardy. Osy jolǵy sapardyń taǵy bir maqsaty – shet elderdegi shyǵarmashylyq ujymdarmen tájirıbe almasý.
Bıyl Qyzylorda qalasynyń Qazaq eliniń astanasy bolǵanyna 100 jyl toldy. Osydan bir ǵasyr buryn Aqmeshitte ótken sezde ultymyzdyń «qazaq» ataýy qaıtarylyp, tarıhı ádildik ornady. Qalanyń aty Qyzylorda bolyp ózgerdi.
Memleket basshysy Qasym-Jomart Kemeluly Býrabaıda ótken Ulttyq quryltaıda el astanasyn Qyzylordaǵa kóshirý týraly sheshimniń qabyldanǵanynyń júz jyldyǵy taǵy bir tarıhı beles ekenin atap ótti.
«Osydan bir ǵasyr buryn ultymyzdyń óz ataýynyń oralýy tarıhı ádildik ornatý jolyndaǵy mańyzdy qadam bolǵanyn ashyq aıtýymyz kerek. Mundaı mańyzdy oqıǵalar el jadynda saqtalýǵa tıis. Osy rette Quryltaıdyń kelesi otyrysyn Syr boıynda, kezinde Qazaq eliniń astanasy bolǵan Qyzylorda qalasynda ótkizýdi usynamyn», dedi Memleket basshysy. Bul sheshimdi jurtshylyq Qyzylordanyń qazaq tarıhynda alar ornyna, Syr óńirindegi bastamalar men jańashyldyqtarǵa berilgen joǵary baǵa dep qabyldady. Osydan bir ǵasyr buryn qazaqtyń saıası, ǵylymı ortalyǵy bolǵan qalada endi ult bolashaǵyna, muratyna qatysty sheshimder qabyldanady.
Qyzylorda oblysynyń Eýropa memleketterindegi óner kúnderiniń alǵashqy konserti «NAURYZ – CELEBRATION OF SPRING» ataýymen Fınlıandııanyń Helsınkı qalasynda ótti.
Is-sharany Qazaqstannyń Fınlıandııadaǵy Elshisi Azamat Ábdraımov ashyp, sahna tórinen osy merekelik keshke qoldaý bildirgen Nurlybek Mashbekulyna arnaıy alǵysyn jetkizdi. Konsertti Eýropanyń 10 memleketindegi elshiler, elshilik qyzmetkerleri, Fınlıandııada turatyn qazaq dıasporasy, stýdentter jáne fın halqy, barlyǵy 500-ge jýyq kórermen tamashalady.
Qazaqtyń dástúrli mýzykasy men ulttyq ónerin ulyqtaǵan Qyzylorda oblystyq fılarmonııasy dástúrli án-jyrdy áýeletti.
Fınlıandııa halqy ǵasyrdan ǵasyrǵa jetken epostyq jyrlaryn, sáýlet jáne beıneleý óneri týyndylaryn mádenı mura retinde qurmet tutady.
Kún men túnniń teńeletin, jer arqasy keńip, kúlli tirshilik qaıta túleıtin tabıǵat merekesindegi konserttiń shymyldyǵy «Jarapazan» jyrymen túrildi. Eýropalyq kórermenge qazaqtyń dástúrimen shashý shashylyp, «Toıbastar» shyrqaldy. Naýryz-dýmanǵa qatysqan qala turǵyndary men qonaqtary, dıaspora músheleri, otandyq jáne sheteldik stýdentter ulttyq mýzykamen jáne dástúrlermen tereńirek tanysýǵa múmkindik aldy.
Ulttyq mýzykanyń uly jaýharlaryn tórtkúl dúnıege tanytyp júrgen «Aqmeshit» folklorlyq ansambli (jetekshisi – Nurǵısa Nurbaı), Syr eliniń óner maıtalmandary Rýslan Ahmetov, Sholpan Bımbetova, Samal Baıseıtova, Aqmaral Noǵaıbaeva, Marat Súgirbaı, aıtysker-aqyn Muhtar Nııazov, halyqaralyq jáne respýblıkalyq konkýrstardyń laýreattary Baǵdáýlet Qarǵabaev, Symbat Tasbergenova, Maǵjan Amanjolov, Aqylbek Tabynbaev, Toqtar Aǵyraev, Aqnur Amanbaeva, Sábıt Dildabaev, Almas Áljanov, Zamanbek Nysanbaev, Arman Tólesh qatysyp, óner kórsetti.
Gastroldik sapar aıasynda kórermenge konserttik baǵdarlamalarmen qatar, qazaqtyń ulttyq taǵamdary men ulttyq naqyshta jasalǵan syı-sııapaty usynyldy. Jurtshylyq tanym men taǵylymǵa toly kesh syılaǵany úshin syr ónerpazdaryna alǵys bildirdi.
